मुंबई - पेट्रोल-डिझेलच्या दरात सातत्याने होत असलेली वाढ आणि टोलमाफीसह इतर विविध मागण्यांसाठी ऑल इंडिया ट्रान्स्पोर्ट असोसिएशनने देशभरात संप पुकारला आहे. स्कूल बस ॲण्ड कंपनी बस ओनर्स असोसिएशनने संपात सहभाग घेतल्याने शुक्रवारी (ता. २०) मुंबईतील अनेक शाळांची बस वाहतूक बंद होती. परिणामी विद्यार्थ्यांची पळापळ आणि पालकांची धावपळ झाली. नोकरीधंदा सोडून त्यांना मुलांना शाळेत पोहचवावे लागले. पर्यायी व्यवस्था नसल्याने काही विद्यार्थ्यांची शाळेला दांडी झाली. ऑल इंडिया ट्रान्स्पोर्ट असोसिएशनने पुकारलेल्या संपात सर्व खासगी वाहतूकदारांनी सहभाग घेतला आहे. बंदमध्ये स्कूल बस आणि खासगी बससह खासगी कॅब, ट्रक, टेम्पो आदी वाहनेही सहभागी झाली आहेत.  स्वतःच्या बस असलेल्या शाळांनी संपात सहभाग घेतला नाही. मुंबईतील २८६९, ठाण्यातील २८५२ आणि पनवेलमधील २२१० स्कूल बसची नोंदणी करण्यात आलेली आहेत. एकूण आठ हजार स्कूल बस आज मुंबईत धावल्या नसल्याचा दावा असोसिएशनने केला आहे.

स्कूल बसचालकांच्या मागण्या 
     मुंबईसह महाराष्ट्रातील सर्व टोल नाक्‍यांवर स्कूल बसना टोलमाफी द्या
     पेट्रोल-डिझेलच्या किमती जीएसटीअंतर्गत आणा
    इंधनाचे दर सहा महिन्यांतून एकदा निश्‍चित करा