मुंबई : स्कॉच व्हिस्कीचे (Scotch Whisky price) दर इतर राज्यांच्या तुलनेत महाराष्ट्रात अधिक असल्याने त्यांच्या उत्पादन शुल्कात (Excise duty) ५० टक्के कपात (fifty percent deduction) करण्याचा निर्णय राज्य सरकारने (Maharashtra Government) घेतला होता. त्यानुसार उत्पादन शुल्क विभागाने नवीन दरांची घोषणा (New rates increases) केली असून यामुळे त्यांच्या विक्रीबाबतचा संभ्रम अखेर दूर झाला आहे.

राज्य सरकारने १८ नोव्हेंबर रोजी उत्पादन शुल्कात कपात केली होती; मात्र त्यानंतर नवीन दर जाहीर न झाल्याने स्थानिक विक्रेत्यांनी लवकरात लवकर दर जाहीर करण्याची मागणी केली होती. त्यानुसार उत्पादन शुल्क विभागाने स्कॉच, व्हिस्कीचे नवीन दर जाहीर केले आहेत. स्कॉच, व्हिस्कीवरील उत्पादन शुल्क तीनशेवरून १५० टक्के करण्यात आले आहे. इतर राज्यांत याच स्कॉच, व्हिस्की मद्याचे दर कमी असल्याने महाराष्ट्रात या मद्याची मोठ्या प्रमाणात अवैध वाहतूक होत होती.

गोव्यात उत्पादित मद्याच्या खेपा राज्यात अनेक वेळा पकडण्यात आल्या होत्या. त्यामुळे आता इतर राज्यांप्रमाणे महाराष्ट्रातही स्कॉच, व्हिस्कीचे दर घसरल्याने बाहेरून राज्यात येणाऱ्या अवैध मद्य वाहतुकीला आळा बसणार आहे. शिवाय, आयात केलेल्या स्कॉचच्या विक्रीतून महाराष्ट्र सरकारला वार्षिक १०० कोटींचा महसूल मिळतो. या शुल्ककपातीमुळे सरकारचा महसूल २५० कोटींपर्यंत वाढण्याची शक्यता व्यक्त केली जात आहे.