रेल्वे स्थानकांवर कडेकोट बंदोबस्त
मुंबई - पुलवामातील दहशतवादी हल्ल्यानंतर देशात पुन्हा घातपाताची शक्‍यता वर्तवण्यात येत आहे. या पार्श्‍वभूमीवर छत्रपती शिवाजी महाराज टर्मिनस, वांद्रे टर्मिनस, लोकमान्य टिळक टर्मिनस (कुर्ला), मुंबई सेंट्रल, चर्चगेटसह मुंबईतील प्रमुख रेल्वे स्थानकांतील सुरक्षेत वाढ करण्यात आली आहे.

या स्थानकांवर रेल्वे सुरक्षा दलाचे पथक डोळ्यांत तेल घालून येणाऱ्या-जाणाऱ्यांच्या हालचालींवर नजर ठेवत आहेत. त्यांच्या मदतीसाठी राज्य राखीव पोलिस दलाची एक तुकडी बोलावण्यात आली आहे. प्रमुख स्थानकांवर संशयास्पद सामानाची श्‍वान पथकांमार्फतही तपासणी सुरू आहे. प्रवाशांकडील संशयास्पद सामानाचीही पोलिस झडती घेत आहेत. बॉंबशोधक व नाशक पथकालाही सज्ज राहण्यास सांगण्यात आले आहे.

"एसटी'मध्येही सावधगिरी
आपटा येथे एसटी बसमध्ये बॉंब सापडल्याच्या पार्श्‍वभूमीवर महामंडळाच्या बसमधून बेकायदा सामान, आणि सामानाची वाहतूक करू नये, अशा सक्त सूचना एसटी महामंडळाच्या मुख्य सुरक्षा व दक्षता अधिकाऱ्यांनी संबंधितांना पत्रकाद्वारे दिल्या आहेत. एसटीचे अनेक चालक-वाहक बसमधून सामानाची बेकायदा वाहतूक करतात. अनेक जण मित्र, परिचितांच्या वस्तूही संबंधितांना पोचवतात. मात्र, याचा फायदा उठवत दहशतवादी घातपात घडवण्यासाठी एसटी बसमध्ये स्फोटके ठेवू शकतात. त्यामुळे आगार व्यवस्थापकांनी चालक-वाहकांना याबाबत सूचना द्याव्यात, असे पत्रकात नमूद आहे.