मुंबई : रेल्वेने कोविड काळापासून ज्येष्ठ नागरिकांना तिकिटामध्ये सवलत देणे बंद केल्यामुळे गेल्या तीन वर्षांत १५ कोटींपेक्षा जास्त ज्येष्ठ नागरिकांना पूर्ण तिकीट काढून प्रवास करावा लागल्याची माहिती आरटीआयअंतर्गत मिळाली आहे. यामुळे अनेक जण केंद्र सरकारच्या कारभारावर संताप व्यक्त करत आहेत. उतरत्या वयात देवदर्शन आणि मनसोक्तपणे फिरण्याचे स्वप्न अधुरे राहिल्याची भावना अनेक ज्येष्ठ नागरिकांनी ‘सकाळ’कडे व्यक्त केली.

भारतीय रेल्वेकडून कोरोनापूर्व काळात ६० वर्षांवरील ज्येष्ठ नागरिकांना रेल्वे तिकिटामध्ये ४० टक्के सवलत दिली जात होती. याशिवाय ५८ वर्षांवरील महिलांना रेल्वे तिकिटात ५० टक्के सवलत दिली जात होती. सर्व प्रकारच्या मेल, एक्स्प्रेस, राजधानी, शताब्दी, दुरांतो रेल्वेगाड्यांमध्ये दिली जाणारी ही सवलत कोरोनाचे कारण समोर करून भारतीय रेल्वेने २० मार्च २०२०पासून बंद केली.

कोरोना संपून तीन वर्षांच्या कालावधीत उलटला तरी अद्याप ज्येष्ठ नागरिकांची बंद केलेली सवलत सुरू करण्यात आलेली नाही. त्यामुळे ज्येष्ठ नागरिकांना रेल्वेचे पूर्ण तिकीट काढून प्रवास करावा लागत असल्याने मोठा आर्थिक फटका बसत आहे.

आरटीआय कार्यकर्ते आणि समाजसेवक अजय बोस यांनी माहिती अधिकारांतर्गत भारतीय रेल्वेकडे १ एप्रिल २०२० ते ३१ जुलै २०२३ या कालावधीत पूर्ण भाडे भरून रेल्वे प्रवासाचे तिकीट घेतलेल्या ज्येष्ठ नागरिक प्रवाशांची एकूण संख्या विचारली होती. त्यांच्या आरटीआयच्या उत्तरात रेल्वे मंत्रालयाने सांगितले की, गेल्या तीन वर्षांत १५ कोटी २६ लाख ५३ हजार ४२६ ज्येष्ठ नागरिकांना पूर्ण भाडे भरून ट्रेनमधून प्रवास केला आहे.