मुलुंडमध्ये शक्ती-भक्ती संगम कार्यक्रम
मुलुंड, ता. ६ (बातमीदार) ः शिवशंभू विचार मंच या संस्थेतर्फे हिंदू साम्राज्य दिन शक्ती-भक्ती संगम या कार्यक्रमाचे आयोजन शनिवारी (ता. ८) सायंकाळी ६.३० वाजता मुलुंड पूर्वेतील शिवगणेश मंदिर नानेपाडा येथे केले आहे. यानिमित्त ह.भ.प. शिरीष महाराजलिखित ‘छत्रपती शिवराय समजून घेताना’ या पुस्‍तकाचे प्रकाशन होणार आहे. शिवकालीन शस्त्र प्रशिक्षण वर्गाचा समारोप सोहळादेखील होणार आहे. प्रमुख वक्ते म्हणून जगद्‌गुरू संत तुकाराम महाराज यांचे ११ वे वंशज ह.भ.प. शिरीष महाराज मोरे यांना आमंत्रित केले आहे. शिरीष महाराज मोरे हे शिवप्रभू विचार मंच पश्चिम महाराष्ट्राचे प्रांत संयोजक आहेत. प्रवेश मोफत असून सर्व नागरिकांनी उपस्थित राहावे, असे आवाहन शिवप्रभू विचार मंच कोकण प्रांताचे संयोजक अभयराजे जगताप यांनी केले आहे.