दाभोळ, (जि.रत्नागिरी) : दापोली तालुक्यातील मुरुड येथे मुख्यमंत्री उद्धव ठाकरे यांचे सचिव मिलिंद नार्वेकर यांनी बांधलेला बंगला स्वत:च पाडण्यास सुरवात केली आहे. भाजपचे माजी खासदार किरीट सोमय्या यांनी हे बांधकाम अनधिकृत असून किनारपट्टी नियमन क्षेत्र (सीआरझेड)मध्ये येत असल्याची तक्रार केली होती.

मात्र महसूल प्रशासनाने कोणतीही नोटिस दिलेली नसताना नार्वेकर यांनी बांधकाम पाडण्याचा निर्णय घेतल्याने आश्चर्य आणि तर्कविर्तक केले जात आहेत. दरम्यान, सोमवारी (ता. २३) मुरुडला उद्‌ध्वस्त केलेल्या बंगल्याची पाहणी करणार असल्याचे सोमय्या यांनी म्हटले आहे. मिलिंद नार्वेकर यांनी मुरुड येथे जागा विकत घेऊन या जागेत असलेले पूर्वीचे घर पाडून तेथे नवीन बंगला बांधण्याचे काम सुरू केले होते.

मात्र भाजपचे माजी खासदार किरीट सोमय्या यांनी हे बांधकाम अनधिकृत असून ते सीआरझेडमध्ये येत असल्याची तक्रार केली होती. या बंगल्याची पाहणी केंद्रीय पर्यावरण विभागाचे अधिकाऱ्यांनीही केली होती.