मुंबई: भारतीय जनता युवा मोर्चाने आज थेट मुंबईत शिवसेना भवनावर (shivsena bhavan) 'फटकार मोर्चा' आयोजित केला होता. अयोध्येतील श्री राम मंदिर (ram mandir) बांधण्यासाठी भूसंपादनाबाबत कागदपत्रे खोटी आणि बनावट असल्याचं वक्तव्य शिवसेनेकडून करण्यात आले तसेच, या जमिनीबाबत घोटाळा झाल्याचा संशय शिवसेना खासदार संजय राऊत यांनी व्यक्त केला होता. त्यामुळे भाजपाने थेट शिवसेना भवनावर मोर्चा काढला होता. (Shivsena bjp activist calsh near to dadar shivsena bhavan dont instigate us shivsena mla sada sarvankar)

यावेळी शिवसेना आणि भाजपा कार्यकर्त्यांमध्ये हाणामारी झाली. दोन्ही बाजूंकडून परस्परांवर आरोप-प्रत्यारोप सुरु आहेत. हा सर्व राडा सुरु असताना माहिम विधानसभेचे शिवसेना आमदार सदा सरवणकर तिथे उपस्थित होते.

"राम जन्मभूमीसाठी शिवसेनाप्रमुखांनी जी आंदोलन केली ती हिंदुस्थानला माहित आहेत. राम जन्मभूमी हा आमचा वयैक्तीक विषय आहे, तो आम्ही पूर्ण करणार अशी भाजपाकडून वातावरण निर्मिती सुरु आहे. त्यामुळे ही समस्या निर्माण झालीय" असे माहिम विधानसभेचे आमदार सदा सरवणकर म्हणाले.

"सेनाभवनावर कोणी आक्रमण करणार असेल, तर शिवसैनिक स्वस्थ बसणार नाही. भाजपाचे कार्यकर्ते चाल करुन सेना भवनाकडे येत आहेत, हे समजल्यानंतर आमच्या महिला तिथे गेल्या. त्यांना चप्पल काढून दाखवण्यात आली. त्यातून नंतर हा सर्व प्रकार घडला. आम्ही घरी सवस्थ झोपून राहू असं होणार नाही. सेनाभवनकडे वाकडी नजर करु नका, एवढीच अपेक्षा आहे. भाजपाने शांततेत आंदोलन केलं असतं, तर आमचा विरोध नव्हता. पण कोणी दगड, धोंडे घेऊन येणार असेल, तर स्वस्थ बसणार नाही" असे सदा सरवणकर म्हणाले.