मुंबई: मुंबई महापालिकांच्या निवडणुका २०२२मध्ये असल्या तरी आतापासून या निवडणुकांचे बिगुल वाजू लागले आहेत. प्रत्येक पक्ष आपापल्या परीने रणनिती आखताना दिसत आहे. त्यातच काँग्रेसने मुंबई महापालिका प्रशासनावर ८०० कोटींच्या घोटाळ्याचा आरोप करत सत्ताधारी शिवसेना यास जबाबदार असल्याचं म्हटलं आहे. "मालमत्ता कराच्या वसुलीत महापालिका प्रशासनाच्या अधिकाऱ्यांनी ७०० ते ८०० कोटी रुपयांचा घोटाळा केला आहे. मालमत्तांच्या 'मापात पाप' करुन अधिकाऱ्यांनी हा घोटाळा केला आहे. एकट्या वरळीतच असा १०० कोटी रुपयांचा घोटाळा असेल", असा आरोप विरोधी पक्षनेते रवी राजा यांनी केला. प्रशासनावर अंकुश नसल्याने सत्ताधारी शिवसेना यासाठी जबाबदार असल्याचाही आरोपही त्यांनी केला.

मुख्यमंत्री उद्धव ठाकरे यांच्या पत्नी रश्मी यांना कोरोनाची लागण

"वरळी येथील मालमत्तेचे क्षेत्रफळ एकूण क्षेत्रफळाऐवजी केवळ दहा टक्क्यांपर्यंतच दाखवून कोट्यवधी रुपयांचा मालमत्ता कर वसुल करण्याच्या जागी केवळ लाखाचा मालमत्ता कर वसूल करण्यात आला. अनेक गिरण्यांच्या भुखंडाबाबतही असाचा घोटाळा करण्यात आला. हा प्रकार फक्त वरळीपुरता मर्यादित नसून संपूर्ण मुंबईत असाच प्रकार सुरु आहे. अशाप्रकारे तब्बल ७०० ते ८०० कोटी रुपयांचा घोटाळा झाला आहे", असा घणाघाती आरोप काँग्रेसने केला. "हे पैसे पालिकेच्या तिजोरीत जमा होऊन मुंबईच्या विकासासाठी वापरले जाणे गरजेचे होते. मात्र, अधिकाऱ्यांनी स्वत:च्याच तिजोऱ्या भरल्या असल्याचंही त्यांनी म्हटलं.

आयुक्तांकडे लेखी तक्रार

रवी राजा यांनी याबाबत पालिका आयुक्त इक्बाल सिंह चहल यांच्याकडे लेखी तक्रार करणार असल्याची माहिती दिली. या घोटाळ्यात सहभागी असलेल्या अधिकाऱ्यांवर कारवाई होणे गरजेचे असून तशी मागणी आयुक्तांकडे करणार असल्याचेही रवी राजा यांनी सांगितले.

(संपादन - विराज भागवत)