मुंबई - महाराष्ट्राच्या आजी/माजी विधिमंडळ सदस्यांना त्यांच्या पत्नीसह अथवा एका सहकाऱ्यासह एसटी महामंडळाच्या सर्व बसमधून मोफत प्रवास करण्याची सवलत देण्यात येत असल्याची घोषणा परिवहन व खारभूमी विकास मंत्री तथा एसटी महामंडळाचे अध्यक्ष दिवाकर रावते यांनी केली.

त्यानुसार महामंडळाच्या वाहतूक विभागामार्फत सवलतीचे निर्देश असलेले परिपत्रक आज काढण्यात आले. महाराष्ट्राच्या स्थापनेपासून आजपर्यंत जे, सन्माननीय व्यक्ती विधान परिषद अथवा विधानसभेत निवडून आले आहेत, अशा आजी व माजी सदस्यांना त्यांच्या पत्नी अथवा सहकाऱ्यासह एसटीच्या कोणत्याही प्रकारच्या (अश्वमेध, शिवनेरी, शिवशाही, हिरकणी व परिवर्तन) बसमधून महाराष्ट्र व आंतरराज्य मार्गावर विनामूल्य प्रवास करता येणार आहे. सदर प्रवासासाठी संबंधित विधिमंडळ सदस्याकडे विधान मंडळ सचिवालयाने पुरविलेले ओळखपत्र असणे अनिवार्य आहे.