मुंबई, ता.24 : ऐतिहासिक वारसा असलेल्या एशियाटिक सोसायटी ऑफ मुंबई या ग्रंथालयाचे कर्मचारी सध्या प्रचंड हवालदिल झाले आहेत. लॉकडाऊनचे कारण सांगून त्यांना अर्ध्यापेक्षा कमी  वेतन दिले जात आहे. त्यात रेल्वे प्रवासाची परवानगी नाही, पी. एफ. आणि इतर कपात यामुळे जगायचे तरी कसे असा प्रश्न येथील कर्मचाऱ्यांना पडला आहे.

देशातील मोठ्या आणि ऐतिहासिक वास्तूंपैकी एशियाटिक ग्रंथालय आहे. येथे मोठमोठे विद्वान आणि उच्चपदस्थ मंडळी येतात. अशा ग्रंथालयात काम करणाऱ्या कर्मचाऱ्यांचे भवितव्य अंधकारमय  झालंय. कर्मचाऱ्यांच्या मदतीसाठी आता बुद्धीजीवींनी पुढाकार घ्यावा असे या कर्मचाऱ्यांना वाटते. अन्यथा आम्हाला जीव देण्याशिवाय पर्याय नाही अशी उद्विग्नता इथल्या कर्मचा-यांनी व्यक्त केली. 

महत्त्वाची बातमी : भाजपला पुन्हा मोठा दणका; उद्या आणखी एक नेता राष्ट्रवादीत करणार प्रवेश!

वर्षानीवर्षं हे कर्मचारी इथे काम करत आहेत.  वयाच्या 50 शी नंतर कुटुंबातील स्थिती, शिक्षण घेणाऱ्यांसाठी कुटुंबात होणारा खर्च अशा आयुष्याच्या नाजूक वळणावर वावरत कशीबशी नोकरी सांभाळत असताना आज हे सहन करावे लागत आहे, त्यामुळे कर्मचारी रडकुंडीला आले आहेत. त्यांना कुणीच वाली नसल्याचे दिसून येत आहे.  

इथल्या 30 कर्मचाऱ्यांना मे 2020 पासून वेतन दिले गेले नाही. ऑगस्ट 2020 पासूनचा प्रवासभत्ता दिला गेला नाही. त्यामुळे कर्मचा-यांमध्ये कमालीचा असंतोष आहे. याबाबत त्यांनी सर्व संबंधितांना पत्रव्यवहार करून तत्काळ कार्यवाही करण्याची मागणी केली आहे. मात्र, त्याला अद्यापही प्रतिसाद मिळालेला नाही.

सातव्या वेतन आयोगाप्रमाणे या कर्मचाऱ्यांना वेतन मिळणे अपेक्षित असतानाही तसे वेतन तर मिळत नाही परंतु जे काही वेतन निश्चित केले आहे, त्यातदेखील मोठ्या प्रमाणावर कपात होत आहे. पैशाअभावी वेतन दिले जात नसल्याचा दावा व्यवस्थापनाचा असला तरी त्यांनी महाराष्ट्र शासनाच्या संबंधित विभागाकडे पाठपुरावा केला नसल्याचे कर्मचाऱ्यांचे म्हणणे आहे. त्यामुळे हा प्रश्न निर्माण झाला आहे. 

महत्त्वाची बातमी : राष्ट्रद्रोहाचा गुन्हा रद्द करावा आणि बजावलेल्या समन्सला स्थगिती द्यावी, कंगनाची मुंबई उच्च न्यायालयात धाव

व्यवस्थापन समितीत महाराष्ट्र शासनाचे तसेच केंद्र शासनाच्या सांस्कृतिक विभागाचा देखील प्रतिनिधी असतो. त्यामुळे हा प्रश्न सहजरित्या सुटू शकतो. तरीही व्यवस्थापनाची उदासीन भूमिका या सर्व प्रकाराला कारणीभूत आहे. त्यात हे 30 कर्मचारी भरडले जात आहे, असेही त्यांचे म्हणणे आहे. कोरोना संकटाचे निमित्त सांगण्यात येत असले तरी निश्चित वेतन नंतरच्या काळातदेखील मिळेल की नाही, याची शाश्वती नाही. कर्मचा-यांना त्यामुळे त्यांचे मासिक खर्च भागविणे अशक्य झाले आहे.

The staff of the Asiatic Society of Mumbai library with a rich historical heritage currently in a state of panic