मुंबई : मुंबईत कोरोनाचे रुग्ण घटत असले तरी पाश्‍चिमात्य देशात आलेल्या दुसऱ्या लाटेच्या पार्श्‍वभूमीवर पुढील काही महिने यंत्रणांसोबतच नागरिकांनी अधिक खबरदारी घ्यावी, असे आवाहन करतानाच मास्क न वापरणाऱ्यांविरुद्ध कडक कारवाई करण्याचे निर्देश मुख्यमंत्री उद्धव ठाकरे यांनी आज दिले. दिवाळी आणि त्यानंतरचे 15 दिवस अत्यंत महत्त्वाचे आहेत. ज्यांचा नागरिकांशी कायमच संपर्क येतो असे विक्रेते, बसचालक, वाहक आदींची सातत्याने चाचणी करावी, अशी सूचना मुख्यमंत्र्यांनी केली. 

हेही वाचा - राज्यातील शाळा सुरू करण्याबाबत मुख्यमंत्र्यांच्या महत्वपूर्ण सूचना

कोरोनामुळे दिवाळी सणाच्या पार्श्‍वभूमीवर मुंबई महानगरात घ्यावयाच्या दक्षतेबाबत मुख्यमंत्री ठाकरे यांनी आज मुंबई महापालिकेच्या अधिकाऱ्यांची बैठक घेतली. परिवहन मंत्री अनिल परब, राज्य टास्क फोर्सचे अध्यक्ष डॉ. संजय ओक, डॉ. शशांक जोशी, महापालिका आयुक्त इक्‍बालसिंह चहल आदी त्यास उपस्थित होते. मुंबई महानगरात "माझे कुटुंब... माझी जबाबदारी' मोहीम यशस्वी राबवल्याबद्दल मुख्यमंत्र्यांनी महापालिका आयुक्त आणि त्यांच्या टीमचे अभिनंदन केले. 
"नागरिकांची दिवाळी सुखाची जावी म्हणून आपण सर्वांनी सतर्कता बाळगत जनजागृतीच्या माध्यमातून कोरोनाचा धोका संपला नसल्याची जाणीव त्यांना करून द्यावी. प्रदूषण कमी झाले नाही तर कोरोनाचे संकट कायम राहील हे त्यांना पटवून द्यावे,' असे आवाहन मुख्यमंत्र्यांनी महापालिकेच्या अधिकाऱ्यांना केले. रुग्णसंख्या कमी होत असल्याने नागरिकांमध्ये मास्क वापरण्याबाबत बेफिकिरी दाखवली जात आहे. मास्क वापरण्याबाबत मोहीम अधिक तीव्र करावी. कायद्याचा धाक दाखवतानाच जनजागृतीवर अधिक भर देऊन मास्क वापरण्याचे आवाहन करावे, असेही त्यांनी सांगितले. 

हेही वाचा - फेक टीआरपी प्रकरण! "हंसा'ने पोलिसांवर केलेल्या आरोपांचा खुलासा करा

कोरोना उपचारासाठी जम्बो सेंटर सुरू करण्यात आली आहेत, त्यांची भविष्यात गरज भासू शकते. ते लक्षात घेऊन नियोजन करावे. जम्बो सेंटरची आवश्‍यक ती देखभाल-दुरुस्ती करून घ्यावी. औषधे उपलब्ध ठेवावीत. जम्बो सेंटरमधील कर्मचाऱ्यांना सुट्टी देण्याचे नियोजन करावे, अशा सूचनाही मुख्यमंत्र्यांनी केल्या. 

जम्बो सुविधांची देखभाल-दुरुस्ती करा 
मुंबईत कोरोना उपचारासाठीच्या ज्या जम्बो सुविधा निर्माण केल्या आहेत, त्यांची देखभाल-दुरुस्ती करावी. जेणेकरून आगामी काळात गरज भासल्यास त्यांचा वापर करता येईल, असे मुख्यमंत्र्यांनी सांगितले. कोरोनाच्या पार्श्‍वभूमीवर मुंबईत सांसर्गिक आजारांवरील उपचाराचे 5000 खाटांचे रुग्णालय करण्याचा निर्धार मुख्यमंत्र्यांनी व्यक्त केला. रुग्णालयाचे काम जनहित लक्षात घेऊन करा, अशी सूचनाही त्यांनी महापालिकेच्या अधिकाऱ्यांना केली. 

हेही वाचा - सुरक्षेच्या कारणास्तव मराठा समाजाचा मशाल मार्च अडवला; मुख्यमंत्र्यांवर आंदोलकांचे टीकास्त्र

कारवाईसाठी अतिरिक्त मनुष्यबळ 
"माझे कुटुंब... माझी जबाबदारी' मोहिमेचा परिणाम मुंबईत कशा प्रकारे झाला याचा टाटा इन्स्टिट्यूट ऑफ सोशल सायन्स (टीआयएसएस) संस्था अभ्यास करणार असल्याचे महापालिका आयुक्त इक्‍बालसिंह चहल यांनी सांगितले. कोरोनाच्या मोफत चाचण्यांसाठी मुंबईत सध्या 244 केंद्रे सुरू करण्यात आली असून दररोज 20 हजार चाचण्यांचे उद्दिष्ट असल्याचे ते म्हणाले. त्याचबरोबर मास्क न वापरणाऱ्यांवर कारवाईसाठी अतिरिक्त मनुष्यबळ वाढवण्यात येत असल्याचेही त्यांनी सांगितले. 

------------------------------------------------------

( संपादन - तुषार सोनवणे )