गेल्या काही काळात कोणताही अनुचित प्रकार घडल्यास नागरिकच कायदा हातात घेत असल्याच्या घटना वाढल्या आहेत. आता मुंबईतून एक धक्कादायक घटना समोर आली आहे. जिथे चोर असल्याच्या संशयातून दोन अल्पवयीन मुलांना बांधून ठेवत त्यांना विवस्त्र करत धिंड काढल्याचे समोर आले आहे.

विलेपार्ले पश्चिम येथील चाळीत राहणाऱ्या ६० वर्षीय आजीच्या तक्रारीवरून या प्रकरणातील तक्रार नोंदवण्यात आली आहे. या वृद्ध महिलेचे १७ आणि १४ वर्षे वयाचे नातवंडेही तिच्यासोबत राहतात. या मुलांनी काही वर्षांपूर्वी त्यांची आई गमावली आहे. तर त्यांचे वडील त्यांना सांभाळत नाहीत.

विलेपार्ले पश्चिमेकडील जुहू परिसरात चोर असल्याच्या संशयावरून दोन अल्पवयीन मुलांना रात्रभर बांधून ठेवत त्यांना मारहाण करत केस भादरून परिसरातून विवस्त्र धिंड काढल्याचा गंभीर प्रकार उघडकीस आला आहे. याप्रकरणी जुहू पोलिसांनी सुरज पटवा याच्यासह तिघांविरोधात गुन्हा नोंदवला आहे.

सोमवारी विलेपार्ले पश्चिमेकडील जुहू पोलीस ठाण्याच्या हद्दीतील नायडू चाळीत हा प्रकार घडला आहे. आपल्या आजी सोबत राहणाऱ्या 17 आणि 14 वर्षीय अल्पवयीन मुलांवर चोरीच्या संशयातून त्यांना रात्रभर डांबून ठेवून मारहाण करत केस भादरलेल्या आणि निर्वस्त्र अवस्थेत लोखंडी साखळीने बांधून मारहाण करताना परिसरातून त्यांची दिंड काढतानाचा व्हिडिओ आजीच्या नजरेस पडल्यानंतर आजीने जुहू पोलीस ठाण्यामध्ये तक्रार दिली.