मुंबई : मुंबईतील ताडदेव परिसरातील सचिनम हाईट्स नावाच्या 20 मजली इमारतीला शनिवारी सकाळी भीषण आग लागली. या आगीत 6 जणांचा मृत्यू (Death) झाला. शनिवारी 6 पैकी 5 मृतदेहांची ओळख पटली मात्र एका मृतदेहाची (Death Body) ओळख पटणे बाकी आहे. त्यासाठी डीएनए चाचणी केली जात आहे. मृतदेहाचा डीएनए जुळण्यासाठी आज कंथारिया कुटुंबातील सदस्याचा डीएनए नमुना घेण्यात येणार आहे. (Taddeo Fire Accident)

सचिनम हाइट्स येथे 19 व्या मजल्यावर राहणाऱ्या मंजुबेन कंथारिया यांचा धाकटा मुलगा किरीट कंथारिया हा अपघातानंतर बेपत्ता आहे. कुटुंबीयांना मंजुबेनचा मृतदेह सापडला, मात्र किरीटचा ठावठिकाणा अद्याप लागलेला नाही. मृत मंजुबेन यांचे जावई सुकेतू शहा यांनी सांगितले की, किरीट हा मंजुबेनसोबत 19 व्या मजल्यावर राहत होता. किरीटची मानसिक स्थिती ठीक नाही. गावदेवी पोलीस ठाण्याच्या एका पोलीस अधिकाऱ्याने सांगितले की, सचिनम हाइट्सच्या आगीत सहा जणांचा मृत्यू झाला असून त्यापैकी पाच जणांची ओळख पटली आहे. एक मृतदेह गंभीररित्या जळाला असल्याने त्याची ओळख पटू शकली नाही.

लोकांचे डीएनए नमुने ओळखण्यासाठी घेतले जात आहेत. सुकेतू शहा यांनी सांगितले की, किरीट बेपत्ता झाल्याच्या पार्श्वभूमीवर पोलिसांनी सोमवारी किरीटचा मोठा भाऊ योगेश याला डीएनएसाठी पोलिस ठाण्यात बोलावले आहे. किरीटचा शोध घेत इमारतीचे सीसीटीव्ही फुटेज आणि शेजारील सोसायटीचे सीसीटीव्ही फुटेज तपासले, मात्र किरीटचा शोध लागला नसल्याचे त्यांनी सांगितले.

नायर रुग्णालयाचे डीन डॉ. रमेश भारमल यांनी सांगितले की, अद्याप एकाही मृतदेहाची ओळख पटलेली नाही. शनिवारीच मृतदेहाचा डीएनए घेण्यात आला आहे. हा डीएनए बेपत्ता सदस्याच्या कुटुंबाशी जुळवला जाईल.