मुंबई : राज्यातील शिक्षकांच्या विविध प्रश्नांसाठी (teachers problem) असंख्य वेळा निवेदने देऊनही त्यावर अंमलबजावणी करण्यास शालेय शिक्षण विभागाकडून (School education Authorities) दिरंगाई केली जात असल्याने याविरोधात शिक्षक परिषदेने (teachers union) मुंबईतील (Mumbai) शिक्षण उपसंचालक कार्यालयासमोर शिक्षक दिनी (teachers day) ५ सप्टेंबर रोजी उपोषण (strike) करण्याचा इशारा दिला आहे.

राज्यात सर्वत्र गणेशोत्सव सुरू होणार असतानाही शिक्षक आणि मुंबई, ठाणेसह कोकणातील शिक्षकेतराच्या वेतनावर कोणताच निर्णय होऊ शकला नाही, त्यामुळे हे वेतन ५ सप्टेंबरपूर्वी करण्यासाठी कार्यवाही करावी अशी मागणी शिक्षक परिषदेने केली आहे. मुंबईतील काही शाळांचे जुलै २०२१ चे वेतन अजूनही झालेले नाही. यामुळे शिक्षकांमध्ये नाराजी पसरली असून त्यामुळे आम्ही ५ सप्टेंबर रोजी शिक्षण संचालक कार्यालयासमोर उपोषण करणार असल्याचे शिक्षक परिषदेचे कार्यवाह शिवनाथ दराडे यांनी सांगितले.

शिक्षक आणि शिक्षकेतरांच्या वेतनासाठीचा निधी हा मंत्रालयातून निधी मंजूर झाल्यानंतर शिक्षण उपसंचालक कार्यालयाने मुंबई विभागासाठी पुरेसा निधी मिळवण्यासाठी प्रयत्न करणे आवश्यक आहे. ते प्रयत्न न केल्याने मुंबई विभागातील शिक्षकांचे वेतन रखडले जात असून त्यामुळे असंख्य शिक्षकांना यामुळे नाहक त्रास सोसावा लागत आहे, यासाठी वेळोवेळी निवेदने देऊनही शिक्षण विभागातील अधिकारी ऐकत नसल्यानेच आम्हाला शिक्षक दिनी उपोषणाचा मार्ग अवलंबावा लागणार असल्याचे दराडे यांनी सांगितले.