मुंबई : मुंबई विमानततळावरून नैनितालला जाणाऱ्या इंडिगो विमानांमध्ये अचानक तांत्रिक बिघाड झाल्यामुळे इंडिगोचे विमान रनवेवरच दोन तास खोळंबून राहिले होते. त्यामुळे दीड ते दोन विमानातच बसून बसून होते. अखेर प्रवाशांचा संताप अनावर झाला आणि त्यांनी विमानाबाहेर पडून रनवेवर ठिय्या आंदोलन सुरू केले. या आंदोलनामुळे मुंबई विमानतळावर मोठा गोंधळ पाहायला मिळत आहे.

मिळालेल्या माहितीनुसार, इंडिगो कंपनीचे विमान मंगळवारी सकाळी ८ वाजता मुंबईहून नैनितालकरिता उड्डाण करणार होते. परंतु तांत्रिक बिघाड झाल्यामुळे विमान दीड ते दोन तास धावपट्टीवरच थांबले. त्यामुळे विमानात बसलेल्या प्रवाशांचाही खोळंबा झाला. अखेर प्रवाशांचा संताप अनावर झाल्याने त्यांनी विमानाबाहेर पडून पर्यायी विमानाची व्यवस्था कंपनीने करावी या मागणीसाठी रन वेवरच ठिय्या मांडला.

त्यामुळे काही काळासाठी मुंबई विमानतळावर गोंधळाचे वातावरण निर्माण झाले होते. शेवटी कायदा आणि सुव्यवस्थेचा प्रश्न निर्माण होऊ नयेत, म्हणून सीआयएसएफच्या जवानांना रन वे वर पाचारण करण्यात आले. रनवेवर बसलेल्या प्रवाशांना बसमध्ये बसवून पुन्हा विमानतळावर आणण्यात आले.