अलिबाग : सारेगम लिटल चॅम्पमध्ये एकापेक्षा एक सुरेल गीते गाऊन अलिबागची कन्या मुग्धा वैशंपायन (Mugdha Vaishampayan) महाराष्ट्राच्या कानाकोपऱ्यात पोहचली. त्यानंतर एकापेक्षा एक सरस कलाकारांनी दूरचित्रवाहिन्यांवरील ‘रिअॅलिटी शो’मध्ये (Reality shows) व्यासपीठ गाजवले. यामध्ये नृतकलाकार पपन पाटील, अंकिता राऊत, गायिका सायली कांबळे, सागर म्हात्रे अशी नावांची यादी मोठी आहे. हे कलाकार आज रायगड (Raigad) जिल्ह्याचे नाव देशपातळीवर गाजवत आहेत. जिल्हावासीयांसाठी ही अभिमानाची बाब ठरली.

रायगड जिल्हा हा सर्वच क्षेत्रातील दिग्गजांचा जिल्हा. सध्याच्या युगातही ही परंपरा कायम आहे. विशेषत: रिॲलिटी शोमध्ये आता जिल्ह्यातील कलाकार चमकत आहेत. पूर्वी असे कार्यक्रम म्हणजे मुंबई, पुणे, नागपूर अशा महानगरातील कलाकारांपर्यंतच होते. गेल्या काही वर्षांपासून रिअॅलिटी शोमध्ये लहान शहरासह ग्रामीण भागातील कलाकारांना व्यासपीठ मिळू लागले. अलिबाग तालुक्यातील मुग्धा वैशंपायन हिने झी मराठी वाहिनीवरील ‘सारेगमप लिटल चॅम्प’ कार्यक्रमात गायनातून स्वतःची एक वेगळी ओळख निर्माण केली.

एक आघाडीची गायिका म्हणून स्वतःचे अस्तित्व निर्माण केले. अलिबागमधील अंकिता राऊत हिने झी युवा वाहिनीवरील ‘अप्सरा आली’ या कार्यक्रमामध्ये सहभाग घेऊन आघाडीची नृत्य कलाकार म्हणून नावलौकिक मिळविला. त्याअगोदर ‘एकापेक्षा एक’ या कार्यक्रमात उरण तालुक्यातील पपन पाटील या चिमुरड्याने व्यासपीठ गाजवले होते. इंडियन आयडॉल’च्या १२ व्या पर्वाचे व्यासपीठ गाजवलेली सुरेल आवाजाची गायिका सायली कांबळे ही रोहा तालुक्यातील आहे.

आता ती सिनेसृष्टीमध्ये पार्श्वगायिका म्हणून पुढे येत आहे. सध्या सुरू असलेल्या ‘इंडियन आयडॉल’ मराठी या कार्यक्रमात उरण तालुक्यातील कोप्रोली येथील सागर म्हात्रे हा गायक आघाडीवर आहे. सध्या तो टॉप आठमध्ये आहे. पेण तालुक्यातील गडब येथील नेहा पाटील ही ‘दम दमा दम’ या कार्यक्रमाबरोबरच उत्तराखंड येथे झालेल्या कार्यक्रमात राज्याचे नेतृत्व केले
होते.अत्यंत समर्पित भावनेने व्यासपीठ गाजविणारी ही तरुणाई आज जिल्ह्याचे नाव गाजवत आहेत. त्यामुळे त्यांचा प्रत्येकालाच अभिमान वाटतो.

सध्या ‘रिअॅलिटी शो’चा जमाना आहे. या माध्यमातून कमी वेळेत स्वतःला शाबीत करण्याची संधी मिळते. या ठिकाणी कमी वेळेत गाणी कशा पद्धतीने बसवायचे हे स्वतःला शिकायला मिळते. राज्यातील कलाकारांचे टॅलेंट या कार्यक्रमातून पाहिले जाते. त्यामध्ये रायगडचा फार मोठा वाटा आहे. १२ वर्षांपूर्वी झी मराठी वाहिनीवरील सारेगमप या लिटील चॅम्प कार्यक्रमात स्पर्धक म्हणून भूमिका बजावली. महाराष्ट्रातील
रसिकांच्या आशीर्वादाने तब्बल बारा वर्षानंतर याच कार्यक्रमात परीक्षक म्हणून संधी मिळाली.
- मुग्धा वैशंपायन, गायिका

वयाच्या आठ वर्षांपासून गायनाचा सराव करीत आहे. २०१० मध्ये झालेल्या सारेगमप लिटल चॅम्प, कलर मराठीमध्ये रायझिंग स्टार या कार्यक्रमांबरोबरच सध्या ‘इंडियन आयडल’ मराठी या कार्यक्रमामध्येदेखील स्पर्धक म्हणून सहभाग घेतला आहे. या माध्यमातून खऱ्या अर्थाने एक व्यासपीठ मिळत असून यातून आपली एक वेगळी ओळख संपूर्ण महाराष्ट्रात होते.
- सागर म्हात्रे, गायक, उरण