ठाणे : जीवे मारण्याची धमकी देत बदलापूर (badlapur) येथील बांधकाम व्यावसायिकाकडून (builder) खंडणी उकळणाऱ्या (extortion) दुकलीला ठाणे गुन्हे अन्वेषण विभागाच्या (thane cid) खंडणीविरोधी पथकाने बेड्या ठोकल्या. कल्पेश जाधव (२६) आणि दीपक संदनशिव (३३) अशी अटक करण्यात आलेल्या आरोपींची (culprit arrested) नावे आहेत.

बदलापूर पूर्व भागातील प्रकाशकुमार जयस्वाल (३८) या बांधकाम व्यावसायिकाला २६ जून २०१९ ते १८ ऑक्टोबर २०२१ या काळात कल्पेश, दीपक, तसेच त्यांच्या इतर आणखी तीन ते चार साथीदारांनी आपसात संगनमत करून त्यांच्याकडून १० लाखांची खंडणी घेतली. जयस्वाल यांना रस्त्यात अडवून त्यांना, तसेच त्यांच्या परिवाराला ठार मारण्याची धमकी दिली. शिवीगाळ, दमदाटी आणि मारहाण करीत त्यांच्याकडून काही रोकड, सोन्याचे दागिने आणि मोबाईल फोन असा दहा लाख ८९ हजारांचा ऐवज जबरदस्तीने काढून घेतले.

या बाबत बदलापूर पूर्व पोलिस ठाण्यात खंडणी उकळणे, मारहाण आणि धमकी दिल्याचा गुन्हा दाखल झाला. याची गांभीर्याने दखल घेत अतिरिक्त पोलिस आयुक्त अशोक मोराळे यांनी हे प्रकरण खंडणीविरोधी पथकाकडे सोपविले. त्यानंतर वरिष्ठ पोलिस निरीक्षक मालोजी शिंदे आणि सुधाकर हुंबे यांच्या मार्गदर्शनाखाली सहायक पोलिस निरीक्षक पी. एस. नाळे यांच्या पथकाने बुधवारी कल्पेश आणि दीपक या दोघांना बदलापुरातून अटक केली.