मुंबई - मध्य रेल्वेच्या मुलुंड रेल्वे स्थानकातील जुना पादचारी पुल तो़डण्यासाठी शनिवार, ३ फेब्रुवारीच्या रात्री ठाणे ते मुलुंड दरम्यान अप आणि डाउन जलद मार्गावर ब्लॉक घेण्यात येणार आहे. रात्री ११.३० ते पहाटे ४.३० वाजेपर्यत ५ तासांचा ब्लॉक असणार आहे. यादरम्यान लोकल आणि मेल-एक्सप्रेसच्या वाहतुकीत बदल केले आहेत.

ब्लॉक दरम्यान रात्री ११ वाजून १८ मिनिटांनी सीएसएमटी स्थानकातून डाउन जलद मार्गावरील खोपोली ट्रेन विद्याविहार ते दिवा स्थानकांदरम्यान डाउन धिम्या मार्गावरुन वळविण्यात येणार आहे. तसेच सीएसएमटी येथून रात्री ९वाजून ५४ मिनिटांनी सुटणारी कल्याण आणि कल्याण स्थानकातून रात्री ११वाजून ५ मिनिटांनी सुटणारी सीएसएमटी लोकल रद्द केल्या आहेत.

२२१५७ छत्रपती शिवाजी महाराज टर्मिनस-चेन्नई सुपरफास्ट मेल, २०१११ छत्रपती शिवाजी महाराज टर्मिनस-मडगाव एक्सप्रेस, ११०५७ छत्रपती शिवाजी महाराज टर्मिनस-अमृतसर एक्सप्रेस, ११०४१ दादर-साईनगर शिर्डी एक्सप्रेस, ११००३ दादर-सावंतवाडी तुतारी एक्सप्रेस, २२१७७ छत्रपती शिवाजी महाराज टर्मिनस-बनारस महानगरी एक्सप्रेस या गाड्या शनिवारी रात्री विद्याविहार ते ठाणे-दिवा स्थानकांदरम्यान पाचव्या मार्गावरुन वळविण्यात येणार असल्याने निर्धारित वेळेपेक्षा १० ते १५ मिनिटे उशिराने धावतील.

तर मुंबईत येणाऱ्या ११०२० भुवनेश्वर-छत्रपती शिवाजी महाराज टर्मिनस कोणार्क एक्सप्रेस, १२८१० हावडा- छत्रपती शिवाजी महाराज टर्मिनस मेल, १२१३४ मंगळुरु-छत्रपती शिवाजी महाराज टर्मिनस एक्सप्रेस, १२७०२ हैदराबाद- छत्रपती शिवाजी महाराज टर्मिनस हुसेन सागर एक्सप्रेस आणि १११४० गदग-छत्रपती शिवाजी महाराज टर्मिनस एक्सप्रेस कल्याण/ठाणे ते विक्रोळी स्थानकांदरम्यान सहाव्या मार्गावरुन धावणार आहेत.