डोंबिवली : ‘गेल्या वर्षीप्रमाणे यंदाही...’ असेच काहीसे कल्याण डोंबिवली शहरातील समस्यांचे झाले आहे. मूलभूत समस्यांकडे नागरिकांचे फारसे लक्ष जाऊ नये म्हणून राजकीय पक्षांकडून विविध सण उत्सवांचे आयोजन केले जात आहे. गणेशोत्सवानंतर नवरात्रोत्सव सुरू झाला असून दांडिया उत्सव राजकीय पक्षांकडून आयोजित केले गेले आहेत. यासाठी शहरातील मैदाने सज्ज झाली असून रस्त्यांवर बॅनरबाजी, कमानी, विद्युत रोषणाई करण्यात आली आहे. मतदारांना आकर्षित करण्यासाठी उत्सवांवर बक्कळ पैसा राजकीय पक्षांकडून खर्च केला जात असताना येथील समस्यांकडे थोडे पहाल का, अशी विचारणा नागरिक करू लागले आहेत.

वाहन कोंडी, अरुंद रस्ते, खड्डे पडून रस्त्यांची झालेली चाळण, कचरा, प्रदूषण, पाणीटंचाई यांसारख्या समस्यांना गेले कित्येक वर्षे कल्याण डोंबिवलीकर तोंड देत आहेत. रस्त्यांच्या कामावरून सध्या येथील राजकीय पक्षांमध्ये आरोप प्रत्यारोप सुरू आहेत. आरोप-प्रत्यारोप करण्यात जेवढी तत्परता दाखविले जात आहे, तेवढी तत्परता समस्या सोडविण्यासाठी मात्र कोणाकडून दाखविली जात नाही. या समस्यांकडेही थोडे लक्ष द्या, अशी मागणी नागरिक करत आहेत.

सण, उत्सव काळात कमानींसाठी रस्ता खणला जातो. त्याची दुरुस्ती मंडळांकडू केली जात नाही. समस्यांकडे लक्ष देण्याऐवजी कार्यक्रम घेतले जातात. राजकारण्यांनी विचार करण्याची गरज आहे.

- उदय पेंडसे, नागरिक

वर्षानुवर्षे समस्या जशाच्या तशा आहेत. रस्त्यांवर खड्डे असणारच याची लोकांना एवढी सवय झाली आहे की, देवगडचा आंबा म्हणजे हापूस असा पेटेंट केला गेला तसाच डोंबिवली म्हणजे खड्डे असा पेटंट करायला हरकत नाही.

- विवेक पंडित, संस्थापक, विद्यानिकेतन शाळा