ठाणे - निवडणूक आयोगाने अजित पवार गटाला राष्ट्रवादी पक्षासह चिन्ह दिले. तर, शरद पवार गटाला राष्ट्रवादी काँग्रेस पक्ष शरदचंद्र पवार असे पक्षाचे नाव मिळाले. त्यानंतर दोन्ही गटात आरोपप्रत्यारोप करण्यात येत आहे. अशातच आता, ठाण्यात हातातील घड्याळ चोरलं; पण, मनगट आमच्याकडेच आहे! राष्ट्रवादी काँग्रेस पक्ष शरदचंद्र पवार. असे बॅनर बुधवारी ठाण्यात लावण्यात आले होते.

त्यातच आता शरदचंद्र पवार गटाचे आमदार डॉ. जितेंद्र आव्हाड यांनी नवे बॅनर्स शहरात लावल्याचे दिसत आहे. त्याच्यावर चिन्ह तुम्हारा, 'बाप' हमारा असा उल्लेख करून अजित पवार गटावर निशाणा साधला आहे. या बॅनरची चर्चा दिवसभर शहरात सुरू होती.

निवडणूक आयोगाने पक्ष आणि चिन्ह शिवसेना शिंदे गटाप्रमाणे उपमुख्यमंत्री अजित पवार यांच्या पक्षाला दिले आहे. तर शिवसेना उध्दव बाळासाहेब ठाकरे या पक्षाप्रमाणे राष्ट्रवादी काँग्रेस पक्ष शरदचंद्र पवार असा नवा गट तयार झाला आहे.

त्यानुसार बुधवारी पक्षाच्या नावाचा बॅनर्स शहरात लावण्यात आले होते. त्यातच आता राष्ट्रवादी काँग्रेस पक्षाने नवा बॅनर्स लावला आहे. या बॅनर्सवर शरद पवार यांचा फोटो लावण्यात आला असून जीत तो आज भी हमारी हुई है !

चिन्ह तुम्हारा, 'बाप' हमारा असे शब्दात अजित पवार गटावर निशाणा साधण्याचे काम केले आहे. बाप हा शब्द लाल अक्षरात आहे. तसेच त्याच्यावर जितेंद्र आव्हाड यांच्यासह जिल्ह्यध्यक्ष, युवक काँग्रेस जिल्हाध्यक्ष आणि अन्य एकाचे नाव आहे. या बॅनर्स ला आता अजित पवार गटाकडून काय उत्तर मिळते हेच पाहावे लागणार आहे.

गेल्या काही महिन्यांपासून ठाणे शहरात सातत्याने सुरू असलेल्या या बॅनर्स वॉरची सवय ठाणेकर नागरिकांना झाली आहे. मात्र अजित पवार गट या बॅनर्सला उत्तर देईल असे राजकीय वर्तुळात बोलले जात आहे.