डोंबिवली : डोंबिवली पश्चिमेत फेरीवाला विरोधी पथकाने केलेल्या कारवाईत फेरीवाल्यांचे वजनकाटे दगडाने ठेचून टाकल्याचा व्हिडीओ समाजमाध्यमावर व्हायरल होत असून ही कारवाई कितपत योग्य, असा सवाल नागरिक उपस्थित करत आहेत.

कल्याण-डोंबिवलीत रस्त्यावरील फुटपाथ फेरीवाले, दुकानदार यांनी व्यापलेले दिसतात. हे अतिक्रमण हटविण्यासाठी पालिकेने फेरीवाला विरोधी पथक नेमलेले आहे. सध्या समाजमाध्यमावर एक व्हिडिओ व्हायरल होत असून यामध्ये पालिका कर्मचारी फेरीवाल्यांचे वजनकाटे दगडाने ठेचून टाकत असल्याचे दिसून येत आहे. ठाकूरवाडी परिसरातील फुटपाथवर बसलेल्या फेरीवाल्यांवर ही कारवाई करण्यात आली असून पाच सहा दिवसांपूर्वीची ही कारवाई असल्याची माहिती सूत्रांनी दिली आहे.

कारवाईचे समर्थन करण्यात येत नाही, परंतु वारंवार सूचना देऊनही त्यांच्या वागणुकीत बदल होत नाही. आर्थिक नुकसान न करता प्रतीकात्मक कारवाई केली आहे. - सुहास गुप्ते, प्रभागक्षेत्र अधिकारी