मुंबई: अडीच महिने बंद असलेली बेस्ट उपक्रमाची बससेवा आजपासून सुरू झाली. सकाळपासून प्रत्येक थांब्यावर तुडुंब गर्दी झाली होती. लोकल बंद असल्याने प्रत्येक बस भरून येत होती. बसमध्ये चढता न आल्याने चाकरमान्यांचे प्रचंड हाल झाले. सुमारे अडीच हजार बसगाड्या रस्त्यावर आणल्याचा दावा प्रशासनाने केला असला, तरी सोशल डिस्टन्सिंगची ऐशीतैशी झालेली बघायला मिळाली. 

सुरुवातीच्या थांब्यापासूनच भरून येणाऱ्या बस पुढे थांबतच नव्हत्या. प्रत्येक बसमध्ये 30 ते 35 प्रवासी होते. मधल्या थांब्यावर एखाद-दुसरा प्रवासी उतरल्यास तेवढ्याच लोकांना बसमध्ये घेतले जात होते. त्यामुळे बस थाब्यावर प्रवाशांची रखडपट्टी होत होती. एका बसमध्ये प्रत्येक आसनावर एक व्यक्ती याप्रमाणे फक्त 30 जणांना बसून व पाच जणांना उभ्याने प्रवासाची परवानगी देण्यात आली आहे. 

हेही वाचा: मुंबईकरांनो, तुमचा लाडका वडापाव तुमच्या सेवेसाठी पुन्हा सज्ज...

थांब्यांवर वाट पाहणाऱ्या प्रवाशांना बस मिळत नव्हती. त्यामुळे प्रवासी हतबल झाले होते. कामावर वेळेत पोहोचण्यासाठी रिक्षा किंवा टॅक्सी हा पर्याय नोकरदारांपुढे होता. बससह खासगी वाहने मोठ्या प्रमाणात रस्त्यांवर आल्यामुळे अनेक ठिकाणी वाहतूक कोंडी झाली होती. बऱ्याच दिवसांनी रस्त्यावर आलेली वाहने ठिकठिकाणी बंद पडल्याचे दिसत होते. त्यामुळे वाहतूक कोंडीत भर पडत होती. वाहतूक कोंडीमुळे सामान्यांचे मोठे हाल झाले. 

बेस्ट बससोबत अत्यावश्यक सेवेसाठी काही लोकल सोडल्या असत्या, तर प्रवाशांचे हाल झाले नसते. लोकल उशिरा सुरू झाल्यास मुंबईकरांच्या गैरसोईत भर पडण्याची शक्यता आहे. बस अपुऱ्या असल्यामुळे सोशल डिस्टन्सिंग धुळीला मिळाल्याचे दिसले. परिस्थिती अशीच राहिल्यास कोरोनाचा प्रादुर्भाव आणखी वाढण्याची शक्यता आहे. 

हेही वाचा: मुंबईतील रस्त्यावर वाहनांची गर्दीच गर्दी; पश्चिम द्रुतगती मार्गावरही वाहतुक कोंडी

'विवेकशून्य निर्णय':

कोरोनाचा प्रादुर्भाव अजूनही कमी झालेला नाही; असे असताना कर्मचाऱ्यांना सुरक्षा न पुरवता कामावर बोलावणे योग्य नाही. हा निर्णय विवेकशून्य असल्याची टीका कामगार नेते शशांक राव यांनी केली. बस वाहक आणि चालकांच्या सुरक्षेचे काय, असा सवालही त्यांनी केला.

there is no social distansing in BEST bus on unlock day one