अलिबाग : नागरिकांना वन्य प्राण्यांची माहिती मिळावी यासाठी अलिबाग तालुक्‍यातील कार्ले खिंडीत पाच वर्षांपूर्वी निसर्ग परिचय केंद्र उभारण्यात आले. त्याचे दरवाजे खिळखिळे झाले आहेत. वीजपुरवठाही खंडित झाला आहे. अन्य समस्यांनीही या वास्तूला ग्रासले आहे. त्यामुळे सरकारच्या उद्देशाला हरताळ फासला गेला असून लाखोंचा निधी पाण्यात गेला आहे. हे केंद्र सामाजिक वनीकरण विभागाकडे वर्ग करण्यात आले आहे. 
निसर्ग परिचय केंद्रात वीजवाहिन्या अस्तावस्त पडलेल्या आहेत. ऑक्‍टोबरपासूनचे बिल न भरल्याने वीजपुरवठा बंद करण्यात आला आहे. शौचालयांची अवस्था दयनीय झाली आहे. या परिसरात कचरा पडलेला आहे. 
पाण्याचा अभाव आहे. 

हे वाचा : जाती आणि राजकारणाविषयी नागरांज मंजूळेंचे मत वाचले का?

आवारातील कृत्रिम तलावाचे पाणी खराब आहे. काही झाडे सुकून गेली आहेत. दरवाजे खिळखिळे झाले आहेत. त्यामुळे येथे येणाऱ्या पर्यटकांचा हिरमोड होत आहे. याबाबत अनेकांनी तक्रारीही केल्या आहेत.
असा आहे केंद्राच्या उभारणीचा हेतू वनांची माहिती पर्यटकांना मिळावी, त्याचे महत्त्व त्यांना समजावे, या उद्देशाने कार्ले खिंड येथील वन विभागाच्या जागेमध्ये पाच वर्षांपूर्वी निसर्ग परिचय केंद्र उभारण्यात आले.

या ठिकाणी वेगवेगळ्या प्रकारच्या झाडांची लागवड करण्यात आली. सुसज्ज अशी इमारत बांधून त्या ठिकाणी वेगवेगळ्या प्राणी व पक्ष्यांची चित्रे लावण्यात आली. अधिकारी आणि कर्मचाऱ्यांना राहण्यासाठी सुसज्ज अशी खोली बांधण्यात आली. वाघ पकडण्याचा पिंजरा या केंद्रामध्ये ठेवण्यात आला. 

माजी राज्यमंत्री मीनाक्षी पाटील यांच्या प्रयत्नाने कार्ले खिंड येथील निसर्ग परिचय केंद्राच्या विकासासाठी निधी उपलब्ध करून देण्यात आला होता. त्याचे कामही चांगले झाले होते. परंतु देखभाल दुरुस्ती योग्य पद्धतीने झाली नसल्याने या केंद्राची अवस्था बिकट झाली आहे. जिल्हा नियोजन मंडळाकडून या केंद्राच्या विकासासाठी प्रयत्न करू.
- पंडित पाटील, माजी आमदार

कार्ले खिंड येथील निसर्ग परिचय केंद्र सामाजिक वनीकरण विभागाकडे वर्ग करण्यात आले आहे. त्यांच्यामार्फत या केंद्राचा विकास केला जाणार आहे.
- मनीष कुमार, उपवनसंरक्षक, वन विभाग, रायगड