ठाणे : ओमिक्रॉनचा (omicron) पहिला रुग्ण कल्याण-डोंबिवलीत सापडल्यानंतर खळबळ उडाली होती. अजूनही परदेश वारी करणाऱ्यांची संख्या ठाणे जिल्ह्यात कमी होताना दिसत नाही. २८ नोव्हेंबरपासून १२ हजार ८२० नागरिक परदेशवारी करून ठाणे (Thane) जिल्ह्यात परतले आहेत, अशी माहिती शासकीय आकडेवारीवरून समोर आली. सुदैवाने दुसरा ओमिक्रॉन (omicron) रुग्ण अद्यापही जिल्ह्यात आढळून आलेला नाही. यामध्ये सर्वाधिक ४,३६७ नागरिक हे ठाणे महापालिका (Thane Municipal Corporation) हद्दीतील आहेत. त्याचबरोबर अन्य ठिकाणीही जिल्ह्यातील ६५४ ठाणेकर नागरिकांची नोंद झाली आहे.

राज्यात ओमिक्रॉनचा पहिला रुग्ण डोंबिवलीत आढळल्यानंतर राज्य शासनाने परदेशातून येणाऱ्या नागरिकांची विमानतळावर तपासणी सुरू केली. परदेशातून आलेल्या नागरिकांची विमानतळावर तपासणी केल्यानंतर त्या नागरिकांची आठ दिवसांनी पुन्हा अँटीजेन चाचणी केली जात आहे. त्यामध्ये पॉझिटिव्ह आल्यावर त्यांची आरटी-पीसीआर चाचणी केली जाते. त्यामध्ये पॉझिटिव्ह आल्यावरच त्याचे जीनोम सिक्वेसिंग तपासणी केली जाते. त्याच्यानंतर तो ओमिक्रॉन पॉझिटिव्ह आहे की नाही, हे स्पष्ट होते.

२८ नोव्हेंबरपासून आतापर्यंत १२,८२० नागरिक परदेशवारी करून ठाणे जिल्ह्यात परतले आहेत. त्यामध्ये १२,१६६ हे नागरिक थेट जिल्ह्यात परतलेले आहेत. परदेशातून आल्यावर मुंबईत ८१, पालघर ४८६, रायगड ८२ आणि इतर ठिकाणी ५ असे ६५४ ठाणे जिल्ह्यातील नागरिकांची नोंद आहे.

प्रशासकीय यंत्रणा सज्ज

आरटी-पीसीआर निगेटिव्ह आल्यावर तपासणी करण्याची गरज नसल्याचे आरोग्य विभागाकडून सांगण्यात आले. मात्र परदेशातून आलेल्या नागरिकांना काही लक्षणे आढळल्यास त्यांचे तातडीने विलगीकरण केले जाते. याबाबत जिल्हा शासकीय यंत्रणेने विशेष खबरदारी घेतली आहे.

परदेशवारी करणाऱ्यांची आकडेवारी

• ४,३६७ - ठाणे शहर

• १,८७२ - कल्याण-डोंबिवली

• ६९४ - ठाणे ग्रामीण

• २,७४६ - नवी मुंबई

• १,७२१ - मीरा-भाईंदर

• ४५९ - उल्हासनगर

• ३०७ - भिवंडी