अलिबाग : युद्ध परिस्थितीमुळे युक्रेनमध्ये (Russia and Ukraine war) अडकलेल्या रायगड जिल्ह्यातील (Raigad) ३२ विद्यार्थ्यांपैकी ३१ जणांना १० दिवसांत मायदेशात (31 Student evacuated) आणण्यात यश आले आहे. पेण तालुक्यातील कल्पित मढवी (Kalpit Madhavi) आता एकमेव विद्यार्थी सुमी शहरात अडकला आहे. त्यालाही लवकरच भारतात आणण्याचे प्रयत्न सुरू असल्याची माहिती जिल्हा प्रशासनाने दिली.

रायगड जिल्ह्यातील अनेक विद्यार्थी दरवर्षी शिक्षणासाठी युक्रेनमध्ये जातात. युद्ध सुरू झाल्यापासून ३२ जण या देशात अडकले. काही जण पूर्वी कोरोना कालावधीत भारतात आले होते. ते पुन्हा युक्रेनमध्ये गेले होते.

हे विद्यार्थी कोणत्या शहरात आहेत, याची माहिती त्यांच्या पालकांनी देण्याचे आवाहन जिल्हा प्रशासनाकडून करण्यात आले होते. त्यानुसार भारत सरकारने यातील ३१ विद्यार्थ्यांना परत मायदेशात सुखरूप आणले. कल्पित मढवी हा आता एकमेव विद्यार्थी त्या देशात अडकला आहे. त्यालाही लवकरच मायदेशात आणण्यात येणार आहे.