नवी मुंबई : नेरूळ रेल्वे स्टेशन ते बामण डोंगरी या मार्गावरील एनएमएमटी बसमध्ये मध्यरात्रीच्या सुमारास घुसलेल्या तिघा मद्यधुंद तरुणांनी बसमधील वाहकाला व प्रवाशांना शिवीगाळ करून मारहाण केल्याची घटना घडली आहे. विशेष म्हणजे या तिघांना पकडण्यास आलेल्या पोलिसांनादेखील त्यांनी हेल्मेटने मारहाण करून जखमी केल्याचे समोर आले आहे. राहुल कांबळे (२४), आकाश जावळे (२३) आणि ऋषिकेश पवार (२२) अशी या तिघांची नावे असून, नेरूळ पोलिसांनी त्यांच्यावर मारहाणीसह सरकारी कामात अडथळा निर्माण केल्याप्रकरणी गुन्हा दाखल करून अटक केली.
 
अटक करण्यात आलेले तिघे तरुण उलवे व पनवेल भागात राहण्यास असून, मागील मंगळवारी (ता.५) मध्यरात्री हे तिघे मद्यधुंद अवस्थेत नेरूळ रेल्वे स्टेशन ते बामण डोंगरी या मार्गावरील १७ क्रमांकाच्या एनएमएमटी बसमध्ये बसले. या वेळी तिघे बसमधून पुढील दरवाजाने चढत असल्याने वाहक केतन चव्हाण यांनी त्यांना पाठीमागील दरवाजाने बसमध्ये चढण्यास सांगितले. या गोष्टीचा त्यांना राग आल्याने त्यांनी वाहक चव्हाण यांना शिवीगाळ करून, लाथा-बुक्‍क्‍यांनी मारहाण केली. त्यामुळे बसचालक व तेथील रिक्षाचालक आणि बसमधील प्रवाशांनी त्या तिघांना समजावण्याचा प्रयत्न केला. मात्र, या तिघांनी त्यांनाही शिगीगाळ करून धमकी दिली. या वेळी बसमधील प्रवाशांनी या तिघांना मारहाण करण्यास सुरुवात केल्याने त्यांनी त्या ठिकाणावरून पलायन केले. याप्रकरणी पोलिसांनी तिघांना ताब्यात घेतले असता, त्यांनी हेल्मेटने पोलिस नाईक पाटील यांच्या तोंडावर मारून त्यांना जखमी केले. या तिघांनी मद्यधुंद अवस्थेत धुडगूस घातल्याने नेरूळ पोलिसांनी त्यांच्यावर गुन्हा दाखल करून अटक केली.