रसायनी : रसायनीतील वडगाव ग्रामपंचायतीच्या हद्दीतील साईनगर, वाशिवलीवाडी येथे रविवारी (ता.२७) वनवासी कल्याण आश्रम आणि कॅप्री फाऊंडेशनच्या (capri foundation) वतीने सामुदायिक विवाह सोहळा (community wedding ceremony) घेण्यात आला. यामध्ये ७४ जोडपी विवाहबंधनात अडकली. कार्यक्रमाला वनवासी कल्याण आश्रमच्या कोकण प्रांतध्यक्षा ठमाताई पवार, कॅप्री ग्लोबल कॅपिटल लिमिटेड कंपनीचे संचालक राजेश शर्मा (rajesh sharma), ट्रस्टी कॅप्री फाऊंडेशनचे बेनी प्रसाद राउका, कंपनीच्या सीएसआर विभागाचे नीता जोशी, वडगाव ग्रामपंचायतीच्या सरपंच गौरी गडगे, उपसरपंच सुजेता पाटील आदी मान्यवर उपस्थित होते.

खालापूर, कर्जत, पनवेल, पेण, उरण, अलिबाग तालुक्यातील बहुतेक आदिवासी वाड्यांतील रहिवाशांची आर्थिक परिस्थिती बिकट असल्याने त्यांच्यासाठी हा विवाह सोहळा घेण्यात आला. सर्व जोडप्यांना कपडे, गृहपयोगी वस्तू देण्यात आल्या आहेत. याशिवाय सर्व विवाह झालेल्या जोडप्यांना विवाह नोंदणीचे प्रमाणपत्र देण्यात आली. कार्यक्रमास मोहोपाडा येथील व्यापारी आणि वाशिवली वाडीतील गजानन शंकर वाघमारे, वेणूताई गजानन वाघमारे यांचे विशेष सहकार्य लाभले.