मुंबई, ता. १७ : सध्या राजकीय पटलावर भोंगा विरुद्ध हनुमान चालिसा असे राजकारण रंगल्याचे दिसते. काही दिवसांपासून मनसेसोबत इतर राजकीय पक्षांकडून हनुमान चालिसेचे पठण ठिकठिकाणी होऊ लागले आहे. साहजिकच हनुमान चालिसेच्या छोट्या पुस्तिकांची मागणी वाढली आहे. अचानक मागणी वाढल्याने बुक स्टॉलमध्येही हनुमान चालिसा पुस्तिकांचा तुटवडा निर्माण झाल्याचे काही पुस्तक विक्रेत्यांनी सांगितले.

महाराष्ट्र नवनिर्माण सेनेचे अध्यक्ष राज ठाकरे यांनी मशिदीवरील भोंग्याला तीव्र आक्षेप घेऊन ३ मेपर्यंत ते उतरवण्यासाठी सरकारला अल्टिमेटम दिला आहे. भोंग्यांना विरोध म्हणून हनुमान चालिसेचे पठण करण्याचे आदेशही त्यांनी दिले आहेत. त्यानंतर मनसेकडून जागोजागी हनुमान चालिसा पठणाचे कार्यक्रम सुरू झाले. साहजिकच मनसे कार्यकर्त्यांनी मोठ्या प्रमाणावर हनुमान चालिसा पुस्तिकांची खरेदी सुरू केली. बऱ्याच ठिकाणी पुस्तिका वाटण्यातही आल्या. परिणामी त्यांची मागणी वाढली. मात्र, त्यांचा पुरेसा साठा नसल्याने तुटवडा जाणवू लागला आहे.

शनिवारी (ता. १६) हनुमान जयंती साजरी झाली. स्वतः राज ठाकरे यांनी पुण्यातील मंदिरात हनुमान चालिसा म्हणत महाआरती केली. राज यांच्या आवाहनामुळे आता राज्यभरात हनुमान चालिसा पठणाचे कार्यक्रम होऊ लागले आहेत. दादर भागात मोठमोठे बुक स्टॉल असल्याने मुंबईतील अनेक भागांतून नागरिक हनुमान चालिसा पुस्तिकेचा शोध घेत तिथे येत आहेत. त्याबद्दल निशांत पारकर यांनी सांगितले, की आम्ही नालासोपारा येथे मंडळातर्फे हनुमान चालिसा पुस्तिकवाटपाचा कार्यक्रम आयोजित केला आहे. त्यासाठी आम्हाला किमान ५०० पुस्तिका हव्या आहेत. ठाण्यामध्ये काही ओळखीच्या व्यक्तींकडून माहिती घेतली; मात्र तिथे पुस्तिका उपलब्ध नाही. त्यामुळे स्वतः दादरमध्ये आलो. तीन-चार दुकाने फिरलो, तरीही १० ते १५ च्या वर पुस्तिका मिळाल्या नाहीत. त्यामुळे प्रकाशन संस्थेचा संपर्क क्रमांक मिळवून त्यांच्याकडून पुस्तिका उपलब्ध होतात का, याचा प्रयत्न आता करणार आहे.

फक्त पाचच पुस्तिका मिळाल्या!
दादर येथील आयडियल बुक डेपोत हनुमान चालिसा घेण्यासाठी आलेल्या सविता देसाई म्हणाल्या, की मला २५० पुस्तिका हव्या होत्या. मात्र, दुकानात केवळ पाचच शिल्लक आहेत. त्यामुळे इतर ठिकाणी पुस्तिका कुठे मिळतात का, याचा आता शोध घेणार आहे.