सकाळ वृत्तसेवा

मुंबई, ता. २४ : आपत्कालीन वेळी आणि अत्यावश्यक कारणांसाठी प्रवाशांना उपनगरीय आणि मेल-एक्स्प्रेस गाड्यांमध्ये ‘अलार्म चेन पुलिंग’चा पर्याय उपलब्ध करून दिला आहे. मात्र, स्थानकात उशिरा पोहोचणे, मधल्या स्थानकांवर उतरणे-चढणे या क्षुल्लक कारणांसाठी अलार्म चेन पुलिंग करणाऱ्या १०८ प्रवाशांवर कारवाई करण्यात आली. त्यांच्याकडून ४७ हजार २०० रुपये दंडवसुली करण्यात आली आहे.
मध्य रेल्वेवर १ एप्रिल ते २० एप्रिल या कालावधीत अलार्म चेन पुलिंगच्या गैरवापराची १५७ प्रकरणे नोंदवली गेली. यापैकी सुमारे १०८ प्रवाशांवर कारवाई करण्यात आली असून, त्यांच्याकडून ४७ हजार २०० रुपये दंड वसूल करण्यात आला आहे. अनावश्यक परिस्थितीत अलार्म चेन पुलिंग करणे हा रेल्वे कायद्याच्या कलम १४१ नुसार दंडनीय गुन्हा आहे. त्यामुळे प्रवाशांनी त्यांच्या संबंधित गाड्या सुटण्याच्या किमान ३० मिनिटे आधी टर्मिनस/स्टेशनवर पोहोचण्याचे आणि मर्यादित सामान घेऊन जाण्याचे आवाहन प्रशासनाच्या वतीने केले आहे.