पालीत १७ अर्ज वैध सोमवारी चित्र स्पष्ट होणार पाली, ता. ५ (वार्ताहर) : पाली नगरपंचायतीतील चार जागांसाठी सोमवारी (ता. ३) सायंकाळपर्यंत २८ उमेदवारी अर्ज दाखल झाले होते. मंगळवारी (ता. ४) झालेल्या छाननीत यातील आठ बाद झाले आहेत; तर तीन दुबार निघाले, अशी माहिती तहसीलदार दिलीप रायण्णावार यांनी दिली. आता एकूण १७ उमेदवार निवडणूक रिंगणात आहेत. सोमवारी (ता. १०) उमेदवारी अर्ज मागे घेण्याची अंतिम तारीख आहे. त्या वेळी खऱ्या अर्थाने कोण कोण निवडणूक रिंगणात आहेत ते कळेल. ओबीसी आरक्षण रद्द झाल्याने पाली नगरपंचायतीच्या प्रभाग क्रमांक २, ५, ८ व १४ या ४ प्रभागांसाठी १८ जानेवारीला निवडणूक होत आहे. प्रभाग क्रमांक २ व १४ साठी सर्वसाधारण महिला आणि प्रभाग क्रमांक ५ आणि ८ साठी सर्वसाधारण खुला असे आरक्षण पडले आहे. ही लढत अटीतटीची होणार असून मोठी चुरस पाहायला मिळणार आहे.