अलिबाग : रायगड (Raigad) जिल्ह्यात सोमवारपासून हेल्मेट जनजागृती मोहीम (Helmet awareness campaign) राबवली जाणार असून याची सुरुवात सरकारी कार्यालयांपासून होणार आहे. विनाहेल्मेट प्रवास करणाऱ्यांवर धडक दंडात्मक कारवाई (strict action) होणार आहे. हेल्मेट वापरण्याबाबत प्रबोधन करण्यात येणार आहे. तसेच अंमलबजावणीसंबंधी व्यापक मोहीमही प्रादेशिक परिवहन कार्यालय (Regional transport office), उप प्रादेशिक परिवहन कार्यालय आणि जिल्हा प्रशासनाच्या मदतीने राबविण्यात येत आहे.

सुरुवातीच्या टप्प्यात या मोहिमेत जिल्ह्यातील सर्व शासकीय, निमशासकीय कार्यालये, शैक्षणिक व इतर संस्था यांना सहभागी करून सरकारी कार्यालयात येताना विनाहेल्मेट दुचाकी वाहन चालविताना आढळून आलेल्यांवर मोटार वाहन कायद्यांतर्गत मोटार वाहन विभाग, तसेच स्थानिक पोलिस विशेष तपासणी मोहीम अधिक व्यापक करणार आहेत.

दरम्यान, हेल्मेट टाळण्यासाठी अनेक जण वैद्यकीय प्रमाणपत्र पोलिसांना दाखवतात. मात्र, कायद्यात असे प्रमाणपत्र असेल तर हेल्मेट घालू नये याचा उल्लेख नाही. डॉक्टरांनीही असे प्रमाणपत्र देऊ नये. हेल्मेट सक्तीतून कोणीही सुटणार नाही, अशा सूचना रायगड पोलिस विभागाकडून देण्यात आल्या आहेत.