अलिबाग : आर्थिक वर्षाच्या शेवटच्या दिवसाची लगबग सुरू असतानाच आपली प्रशासकीय जबाबदारी सांभाळत जिल्हा शल्यचिकित्सक डॉ. सुहास माने (Dr suhas Mane) यांनी एका रुग्णावर गुरुवारी (successful surgery) यशस्वी शस्त्रक्रिया केली. रुग्ण महिलेचे नाव (Patient sumitra patil) सुमित्रा पाटील असे आहे. सर्वच शासकीय कार्यालयांप्रमाणे जिल्हा रुग्णालयातही (civil hospital) आर्थिक बाबींविषयी कामकाजाची धावपळ सुरू होती.

याच दिवशी अपंगांना प्रमाणपत्र वाटप करण्यात येत होते. अशा वेळेला पेण तालुक्यातील रावे गावातील सुमित्रा पाटील ही ५० वर्षीय महिला पोटदुखीच्या त्रासामुळे जिल्हा रुग्णालयात दाखल झाली. तिची गंभीर परिस्थिती पाहून बाह्यरुग्ण विभागातील डॉ. परजणे यांनी त्यांना तातडीने तपासले. त्यावेळी या महिलेला ‘अक्युट अपेंडीसायटीस’चा त्रास असल्याचे निदान झाले.

त्यांच्यावर तात्काळ शस्त्रक्रिया करणे गरजेचे असल्याचे डॉ. परजणे यांनी जिल्हा शल्यचिकित्सक डॉ. सुहास माने यांना सांगितले. सायंकाळी ७.३० वाजता यशस्वी शस्त्रक्रिया पार पडली. पाटील यांची प्रकृती स्थिर असून त्यांना होणारा त्रासदेखील कमी झाला आहे.