अलिबाग : चोरीप्रकरणी लक्ष्मी जाधव या महिलेला (Robbery crime) अलिबाग येथील मुख्य न्यायदंडाधिकारी सुनैना पिंगळे यांनी एक वर्ष सश्रम कारावास आणि पाच हजार रुपये दंडाची शिक्षा सुनावली. अलिबागमधील (Alibag) चेंढरे येथील जतिन कराणी यांच्या घरी आरोपी लक्ष्मी जाधव (Culprit Laxmi Jadhav) ही महिला दहा वर्षांपासून घरकाम करीत होती. २ ऑक्टोबर २०२१ या दिवशी तिने कपाटातून २५ हजार रुपये चोरले.

या प्रकरणी अलिबाग पोलिस ठाण्यात गुन्हा दाखल करण्यात आला होता. पोलिसांनी तपास पूर्ण करून न्यायालयात दोषारोपत्र दाखल केले होते. सरकारी पक्षातर्फे न्यायालयात साक्षीदार म्हणून फिर्यादी जतिन कराणी, पंच सुधाकर घरत, प्रतित्रा पवार, तपासीक अंमलदार उपनिरीक्षक ओमप्रकाश कावळे यांना तपासण्यात आले.

सरकारी अभियोक्ता म्हणून कविता परीट यांनी काम पाहिले. न्यायालयात केलेला यक्तिवाद, साक्षीदार, पंच, तपास पथकाकडील पुराव्यानुसार लक्ष्मी जाधव या महिलेस दोषी ठरवत न्यायालयाने एक वर्ष सश्रम कारावासाची शिक्षा सुनावली असल्याची माहिती देण्यात आली.