कर्जत, ता. ४ (बातमीदार) : मुलगा आणि मुलीच्या विवाह सोहळ्यातील अनाठायी खर्च टाळून कर्जत तालुक्यातील अनिल थोरवे आणि पत्नी रंजना थोरवे या दाम्पत्याने या रकमेतून रायगड जिल्हा परिषदेच्या भिसेगाव शाळेस दूरचित्रवाणी संच भेट दिला. ई-लर्निंग शिक्षणासाठी मदत केली.
कोरोनामुळे जिल्हा परिषदेच्या अनेक मराठी शाळा बंद होत्या. त्यामुळे विद्यार्थ्यांचे शैक्षणिक नुकसान झाले. थोरवे कुटुंबीयांनी ही जाणीव ठेवत मुलांच्या विवाह सोहळ्यातील खर्च टाळून भिसेगाव शाळेला मदत केली.
थोरवे दाम्पत्याप्रमाणेच समाजातील अन्य व्यक्तींनी पुढाकार घेतला, तर जिल्हा परिषदेच्या सर्व शाळांचा दर्जा सुधारण्यासाठी नक्कीच सहकार्य मिळेल, असे मत रेल्वे पोलिस निरीक्षक संभाजी यादव यांनी व्यक्त केले. कार्यक्रमास कल्याण डोंबिवली महानगरपालिकेचे उपायुक्त रामदास कोकरे, भिसेगाव केंद्र शाळेच्या केंद्र प्रमुख नलिनी साळोखे, मुख्याध्यापिका कांचन पाटील, पदवीधर शिक्षक विनोद पवार, उपशिक्षिका रंजना थोरवे, शारदा भालेराव, नेरळ कन्याशाळेचे मुख्याध्यापक भास्कर थोरवे, माजी नगरसेवक पुंडलिक भोईर, सामाजिक कार्यकर्ते प्रशांत उगळे, प्रभाकर गंगावणे आदी मान्यवर उपस्थित होते.