जॉन अब्राहम, एकता कपूरला कोरोना प्रेम चोप्रा, उमा चोप्रा यांच्यावरही ‘लीलावती’मध्ये उपचार मुंबई, ता. ३ ः बॉलीवूड अभिनेता जॉन अब्राहम, मालिका निर्माती एकता कपूर, ज्येष्ठ अभिनेते प्रेम चोप्रा आणि त्यांच्या पत्नीला कोरोनाची लागण झाली आहे. एकता कपूरने तिच्या ‘इन्स्टाग्राम’ अकाऊंटवरून कोरोनाची बाधा झाल्याची बातमी ‘शेअर’ केली आहे. एकता हिच्यावरील कोरोना चाचणी पॉझिटिव्ह आली आहे. माझी प्रकृती ठीक आहे. माझ्या संपर्कातील सर्वांनी कोरोना चाचणी करून घ्यावी, असे तिने पोस्टमध्ये म्हटले आहे. सध्या ती घरी अलगीकरणात आहे. अभिनेता जॉन अब्राहम आणि त्याची पत्नी प्रिया यांना कोरोनाची बाधा झाली असून ते दोघे घरी अलगीकरणात आहेत. दरम्यान, प्रसिद्ध अभिनेते प्रेम चोप्रा आणि त्यांची पत्नी उमा चोप्रा यांची कोरोना चाचणी पॉझिटिव्ह आली आहे. दोघांवरही वांद्रे येथील लीलावती रुग्णालयात उपचार सुरू आहेत. दोघांचीही प्रकृती चांगली आहे. एक ते दोन दिवसांत त्यांनी घरी सोडण्यात येईल, असे त्यांच्यावर उपचार करणारे डॉ. जलील पारकर यांनी सांगितले.