लसीकरणास पहिल्याच दिवशी गर्दी डोंबिवली, ता. ३ : १५ ते १८ वयोगटातील विद्यार्थ्यांच्या लसीकरणाला सोमवारपासून सुरुवात झाली आहे. पहिल्यात दिवशी विद्यार्थ्यांनी लसीकरण केंद्रावर गर्दी केली. कल्याण-डोंबिवलीत रुक्मिणीबाई रुग्णालय, कल्याण पश्चिम, शास्त्रीनगर रुग्णालय, डोंबिवली पश्चिम, सावळाराम क्रीडा संकुल, डोंबिवली पूर्व, शक्तिधाम कोळसेवाडी, कल्याण पूर्व, आर्ट गॅलरी, कल्याण पश्चिम, मोहने लसीकरण केंद्र विराट क्लासिक, यादव नगर रोड, आंबिवली या केंद्रांवर विद्यार्थ्यांसाठी सकाळी ९ ते सायंकाळी ५ या वेळेत लसीकरणाची सोय करण्यात आली होती. काही केंद्रावर सकाळी १० पासून आलेल्या विद्यार्थ्यांचा दुपारी २ वाजले तरी नंबर न आल्याने मुले वैतागलेली दिसत होती. ऑनलाईन व ऑफलाईन विद्यार्थ्यांच्या वेगळ्या रांगा, लहान मुले असल्याने त्यांना बसण्याची सोय तसेच दिवसाला किती विद्यार्थ्यांना लस दिली जाणार हे पालिकेने निश्चित करावे, अशी प्रतिक्रिया यावेळी पालकांनी व्यक्त केली. कल्याण डोंबिवली पालिका क्षेत्रात पहिल्याच दिवशी २ हजार ६५३ विद्यार्थ्यांचे लसीकरण करण्यात आले.