बादलीत पडून चिमुकल्याचा मृत्यू भिवंडी, ता. ४ (बातमीदार) ः एक वर्षाचा चिमुकला रांगत रांगत खेळत असताना बाथरूममधील पाण्याने भरलेल्या बादलीत पडल्याने त्याचा मृत्यू झाल्याची घटना भिवंडीतील देऊनगर परिसरात घडली. याप्रकरणी भोईवाडा पोलिस ठाण्यात अकस्मात मृत्यूची नोंद करण्यात आली आहे. दिलकैश अन्सारी (१) असे चिमुरड्याचे नाव आहे. घटनेच्या वेळी दिलकैशची आई रात्रीचे जेवण करण्यासाठी स्वयंपाकघरात; तर त्यांची इतर मुले घरात हॉलमध्ये बसून टीव्ही बघत होती. त्या वेळी खेळता खेळता दिलकैश बाथरूममधील पाण्याने भरलेल्या बादलीत जाऊन पडला. यात त्याचा मृत्यू झाला. दिलकैशला सहा भावंडे असून तो सर्वांत लहान होता.