मुंबई विद्यापीठाच्या पेट परीक्षेचा निकाल जाहीर मुंबई, ता. ५ : मुंबई विद्यापीठाने पीएच. डी. प्रवेश परीक्षेसाठी मागील महिन्यात घेतलेल्या ऑनलाईन पेट परीक्षेचा निकाल जाहीर करण्यात आला आहे. यावेळी एकूण निकाल ५७.५७ टक्के इतका लागला आहे. विद्यार्थ्यांनी परीक्षा दिलेल्या लिंकवरून हा निकाल उपलब्ध करून देण्यात आला आहे. विद्यार्थ्यांना परीक्षेच्या वेळी उपलब्ध करून देण्यात आलेली लिंक, युजर आयडी आणि पासवर्डच्या साह्याने परीक्षेचा निकाल पाहता येणार असल्याचे परीक्षा व मूल्यमापन मंडळाचे संचालक डॉ. विनोद पाटील यांनी सांगितले. मुंबई विद्यापीठाने १७, १८ आणि २१ डिसेंबर २०२१ अशा तीन दिवसांत विविध विषयांसाठी पेट परीक्षा घेतली. त्यामध्ये एकूण चार हजार ५०० विद्यार्थ्यांनी परीक्षा दिली. त्यांपैकी दोन हजार ५९१ विद्यार्थी उत्तीर्ण झाले आहेत.