झाईच्या विकासाला गती ५० लाख रुपयांचा निधी मंजूर बोर्डी, ता. ९ (बातमीदार) ः झाई बोरीगाव ग्रुप ग्रामपंचायतीच्या अंतर्गत येणाऱ्या मच्छीमारी वस्ती असलेल्या झाई गावाच्या विकासासाठी ५० लाख रुपयांचा निधी तातडीने मंजूर करण्यात आला आहे. जिल्हाधिकारी माणिकराव गुरसळ यांनी नुकतीच झाई मच्छीमारी वस्ती ग्रामस्थांची भेट घेतली. या वेळी स्थानिक ग्रामस्थांनी समुद्राकडे जाणारा रस्ता व मच्छीबाजार भाग अतिशय खराब झाल्याने गैरसोय होत असल्याचे जिल्हाधिकाऱ्यांच्या नजरेस आणून दिले. या पार्श्वभूमीवर जिल्हाधिकारी माणिकराव गुरसळ यांनी जिल्हा नियोजन समितीच्या अंतर्गत येणाऱ्या पर्यटन विकास निधीतून ५० लाख रुपये खर्च करण्याची प्रशासकीय मंजुरी दिली. गावातील समुद्राकडे जाणारा रस्ता, मच्छीबाजार व छोट्या गल्लीबोळांतील रस्ता यांच्या कामांचा सार्वजनिक बांधकाम खात्याच्या अंतर्गत आराखडा तयार केला जाईल. नंतर निविदा प्रक्रिया मंजूर झाल्यानंतर हे काम करण्यात येणार आहे. - एस. डी. पावरा, अभियंता, सार्वजनिक बांधकाम विभाग