गोदामात गर्दी करणाऱ्या डिलिव्हरी कर्मचाऱ्यांना दंड सकाळ वृत्तसेवा मुंबई, ता. ९ : कोरोना प्रतिबंधक नियमांच्या पार्श्वभूमीवर परळ येथील ‘झेप्टो ऑनलाईन’च्या ऑर्डरच्या गोदामात होणाऱ्या गर्दीबाबत स्थानिक नागरिकांनी तक्रार केली. पाहणी करून गोदामातील कर्मचाऱ्यांवर दंडात्मक कारवाई करण्यात आली. ‘एफ’ दक्षिण विभागातील परळ परिसरात असलेल्या झेप्टो ऑनलाईन ऑर्डरच्या गोदामातून मुंबई आणि नजीकच्या परिसरात वस्तू पोहोचवल्या जातात. यासाठी वेगवेगळ्या विभागांतून शेकडो तरुण परळ येथील गोदामात येतात. यामुळे गोदामाबाहेर गर्दी होत असल्याच्या तक्रारी स्थानिकांकडून वारंवार करण्यात आल्या. स्थानिक नगरसेवक अनिल कोकीळ यांच्याकडे तक्रारी आल्यानंतर त्यांनी पोलिस तसेच पालिका प्रशासनाकडे तक्रार दाखल केली. त्यानंतर पालिका आणि पोलिस अधिकारी यांनी गोदामाची पाहणी केली. यामुळे नागरिकांच्या आरोग्याला असलेला धोका लक्षात घेत गोदामाच्या सुमारे ६० कर्मचाऱ्यांकडून दंड वसूल केला. याप्रकरणी भोईवाडा पोलिस ठाण्यात तक्रार दाखल करण्यात आली आहे. ...