गर्दी करणाऱ्या डिलिव्हरी बॉईजवर कारवाई चेंबूर, ता. ९ (बातमीदार) ः परळ गावतील ऑनलाईन विक्री करणाऱ्या कंपनीच्या गोडाऊनजवळ डिलिव्हरी बॉईजनी गर्दी करून पालिकेचे नियम धाब्यावर बसवल्याने शिवसेनेच्या तक्रारीवरून पालिका व पोलिसांनी डिलिव्हरी बॉईजवर धडक कारवाई करून कार्यालयाला टाळे ठोकले. परेल येथील एफ साऊथ परिसरात परळ गाव आहे. या गावातील चाळीत हे गोडाऊन आहे. काल एकाच वेळी गोडाऊनमध्ये ५० ते १०० डिलिव्हरी बॉईज एकत्र आले होते. सध्या कोरोनाने मुंबई शहरात पुन्हा हाहाकार माजवलेला आहे. त्यातच सर्व एकत्र जमून पालिकेच्या नियमाची पायमल्ली करीत होते. याबाबत नागरिकांनी आमदार अजय चौधरी व शिवसेनेचे नगरसेवक अनिल कोकीळ यांच्याकडे तक्रार केली होती. चौधरी यांच्या सूचनेनुसार नगरसेवक अनिल कोकीळ यांनी एफ साऊथ आरोग्य विभाग व पोलिस ठाण्यात तक्रार केली. पालिका अधिकारी यांनी तक्रारीची दखल घेऊन पोलिस अधिकारी यांच्यासमवेत पाहणी करत संयुक्तपणे ६० कर्मचाऱ्यांकडून दंड वसूल केला. ...