जलवाहिनी फुटली अंबरनाथमध्ये प्रतिदिन शेकडो लिटर पाणी वाया बदलापूर, ता. १० (बातमीदार) : बदलापूर पश्चिमेकडील आशीर्वाद हॉस्पिटलजवळची जलवाहिनी फुटली आहे. यामुळे शेकडो लिटर पाणी वाया जात आहे. समाजसेविका संदीपा नवगिरे यांनी लक्ष घालून महाराष्ट्र जीवन प्राधिकरणाच्या नजरेस ही बाब आणून दिली आहे. आधीच शहरात पाणीटंचाई असताना ही पाइपलाइन लवकरात लवकर दुरुस्त करून देण्याची मागणी परिसरातील नागरिक करत आहेत. गेल्या अनेक दिवसांपासून ही पाइपलाइन फुटलेली असून, संबंधित विभागाचे दुर्लक्ष होत आहे. अनेक दिवसांपासून या लाईनच्या दुरुस्तीसाठी संदीपा नवगिरे यांनी मजीप्राचे उपविभागीय अधिकारी अभियंता राम देगावकर यांच्याकडे तगादा लावला आहे. या पाईपलाईनमधून अंबरनाथच्या काही भागांत पाणीपुरवठा केला जातो. त्यामुळे येथील नागरिकांना पूर्वसूचना देऊन, एक दिवस पाणीपुरवठा बंद करून या पाइपलाइनचे काम करून देण्यात येईल, असे आश्वासन देगावकर यांनी दिले आहे.