मुरबाडमध्ये सहा उमेदवारांची माघार मुरबाड, ता. १० (बातमीदार) : मुरबाड नगर पंचायतीच्या चार प्रभागांतील निवडणुकीसाठी पंधरा उमेदवार रिंगणात उरले आहेत. आज सहा उमेदवारांनी अर्ज मागे घेतले आहेत. आता खरी लढत शिवसेना व भाजपमध्ये होणार आहे, अशी चिन्हे आहेत. राष्ट्रवादी काँग्रेस पक्षाने शिवसेनेला पाठिंबा दिला आहे, तर काँग्रेस मनसेतर्फे प्रत्येकी एक उमेदवार रिंगणात आहे. प्रभाग क्रमांक २ मध्ये स्वाती शिरोसे व पूजा शिंदे, प्रभाग क्रमांक १२ मध्ये जगन्नाथ माळी, सुवर्णा माळी व शाम माळी या तीन, तर प्रभाग क्रमांक १७ मध्ये बायमा दुधाळे अशा एकूण सहा उमेदवारांनी माघार घेतल्याचे सहायक निवडणूक निर्णय अधिकारी पारितोष कंकाळ यांनी सांगितले. प्रभाग क्रमांक दोनमध्ये भाजप उमेदवार मानसी देसले यांना शिवसेना उमेदवार नंदा शेळके यांचे आव्हान आहे. प्रभाग क्रमांक पाचमध्ये भाजपचे किसन कथोरे व विनोद नार्वेकर यांची मागील निवडणुकीप्रमाणे अटीतटीची लढत होणार आहे. प्रभाग क्रमांक बारामध्ये शिवसेनेचे चिंतामण माळी व भाजपचे मोहन गडगे यांच्यामध्ये लढत होणार आहे. प्रभाग क्रमांक १७ मध्ये सर्वात जास्त पाच उमेदवार रिंगणात आहेत.