आजपासून नीट समुपदेशनला सुरुवात मुंबई, ता. ११ : सर्वोच्च न्यायालयाच्या आदेशानंतर मेडिकल कौन्सिलिंग कमिटीमार्फत (एमसीसी) नीट पीजी समुपदेशनाची प्रक्रिया बुधवारपासून (ता. १२) सुरू होत आहे. ऑल इंडिया कोटा अंतर्गत उपलब्ध असलेल्या जागांसाठी प्रथमच ही प्रक्रिया चार टप्प्यात पार पडणार आहे. यापूर्वी समुपदेशनाच्या दोनच फेऱ्या होत होत्या. नीट-पीजी परीक्षा ११ सप्टेंबर २०२१ रोजी घेण्यात आली. या परीक्षेचा निकाल सप्टेंबरच्या शेवटच्या आठवड्यात जाहीर झाला. त्यानंतर सुमारे ४५ हजार पदव्युत्तर जागांसाठी विद्यार्थी समुपदेशन प्रक्रिया सुरू होण्याची वाट पाहत होते. यापूर्वी समुपदेशनाच्या दुसऱ्या फेरीनंतर शिल्लक राहिलेल्या जागा राज्यांना परत केल्या जात होत्या. यंदा मात्र तसे होणार नाही. यंदा सर्व जागा ऑल इंडिया कोटामध्ये समर्पित केल्या जाणार असल्याने यातून मोठ्या प्रमाणावर स्थानिक आणि ऑल इंडिया कोट्यातील विद्यार्थ्यांना जागा उपलब्ध होणार आहेत. त्यामुळे देशाच्या वैद्यकीय सेवेला बळकटी येईल, असे केंद्रीय आरोग्यमंत्री मनसुख मांडविया यांनी म्हटले आहे.