मकरसंक्रांतीवर कोरोनाची संक्रांत रेवदंडा, ता. १२ (बातमीदार) : कोरोनाची पहिली लाट ओसरली, त्या वेळी नागरिकांनी मकरसंक्रांतीचा सण उत्साहात साजरा केला होता. आता पुन्हा कोरोनाचे रुग्ण वाढत असल्याने सरकारने निर्बंध लादले आहेत. त्यामुळे मकरसंक्रांतीवर कोरोनाची संक्रांत आली आहे. बाजारपेठ जरी मकरसंक्रांतीसाठी सजले असले तरी ग्राहकराजा हव्या त्या प्रमाणात खरेदीसाठी बाहेर पडत नाहीत. कोरोनाच्या वाढत्या संख्येमुळे महिलांच्या वाण लुटण्याचा कार्यक्रमाची अनिश्चितता जाणवत आहे. त्यामुळे कुठेही खरेदी होताना दिसत नाही. संक्रांती सणासाठी फुल बाजारातील भाव वधारलेले आहेत; पण ग्राहकराजाच दिसत नाही. याशिवाय, महागाई आणि लालपरीचा चिघळलेला संप यामुळेही बाजारपेठेत ग्राहकांची वर्दळ घटली आहे. अनेक नोकरदार महिलांची तर तयार तीळगुळ आणि हलव्याला पसंती देत आहेत. वाण देण्यासाठी सुकडी विक्री करणारे व्यावसायिकही ग्राहकांच्या प्रतीक्षेत आहेत.