वसई-विरार पालिकेच्या आयुक्तपदी अनिलकुमार पवार विरार/वसई (बातमीदार) : वसई-विरार महापालिकेचे आयुक्त गंगाथरन डी. यांची बदली होऊन त्यांच्या जागी अप्पर जिल्हाधिकारी अनिल पवार यांची नियुक्ती करण्यात आली आहे. उपसचिव प्रियांका कुलकर्णी यांनी याबाबतचे आदेश काढले आहेत. गंगाथरन डी. यांना मंत्रालयात उपसचिव म्हणून नियुक्ती करण्यात आली आहे. गेल्या दोन महिन्यांपासून गंगाथरन डी. यांची बदली होणार, अशा चर्चा होत्या. त्यांना अखेर मंगळवारी (ता. ११) पूर्णविराम मिळाला आहे. गंगाथरन डी. यांचा कार्यकाळ जुलै २०२० ला संपुष्टात आला होता; परंतु निवडणुकीच्या कामासाठी आणि कोरोनाच्या पार्श्वभूमीवर त्यांना मुदतवाढ देण्यात आली होती. गंगाधरन डी. यांनी त्यांच्या कार्यकाळात आरोग्य विभागात केलेले बदल, कर्मचाऱ्यांना लावलेली शिस्त, हयगय करणाऱ्या अभियंत्यांसह कर्मचाऱ्यांना घरचा रस्ता त्यांनी दाखवत अनेक विकासकामांना हात घातला. मालमत्ता कराशिवाय अन्य कर लागू करून वसुलीवर देखील भर दिला. मराठी भाषेतूनच नागरिक, लोकप्रतिनिधी यांच्याशी संवाद साधत असल्याने ते लोकप्रिय ठरले होते.