पालघरमधील अवैध धंद्यांवर कारवाई करा मनोर, ता. १३ (बातमीदार) : पालघर जिल्ह्यातील अनधिकृत धंद्यांवर कारवाई करण्याची मागणी आदिवासी-आगरी-कुणबी एकता मंडळाने मुख्यमंत्री उद्धव ठाकरे यांच्याकडे पत्राद्वारे केली आहे. अवैध धंदेचालक आणि पोलिस कर्मचाऱ्यांमध्ये लागेबांधे असल्याचा आरोपही पत्रातून करण्यात आला आहे. पालघर जिल्ह्यातील तलासरी, कासा, डहाणू, घोलवड, वाणगाव, बोईसर, जव्हार, मोखाडा, वाडा पोलिस ठाण्याच्या हद्दीत अवैध धंदे सुरू आहेत. अनेक पोलिस अधिकारी व कर्मचाऱ्यांकडून होत असलेल्या पैशांच्या देवाण-घेवाणीचे मोबाईल संभाषण उपलब्ध झाले आहेत. त्यामुळे मुख्यमंत्र्यांनी लक्ष घालून अवैध धंदे तात्काळ बंद करावे. तसेच पोलिस अधिकारी आणि कर्मचाऱ्यांची चौकशी करून निलंबनाची कारवाई करण्याची मागणी करण्यात आली आहे.