मुंब्रा येथून दुचाकी चोरटा अटकेत डोंबिवली, ता. १३ ः मुंब्र्यासह आजूबाजूच्या परिसरातून दुचाकी चोरून त्यांची विक्री करणाऱ्या अट्टल चोरट्यास मानपाडा पोलिसांनी अटक केली आहे. शाहरुख शेख असे चोरट्याचे नाव असून त्याच्याकडून ५ लाखांच्या एकूण १३ दुचाकी हस्तगत केल्याची माहिती सहाय्यक पोलिस आयुक्त जयराम मोरे यांनी दिली. मानपाडा पोलिस ठाण्याचे वरिष्ठ निरीक्षक शेखर बागडे यांच्या मार्गदर्शनाखाली सहाय्यक निरीक्षक अनिल भिसे, उपनिरीक्षक सुनील तारमाळे यांच्या पथकाने संशयित आरोपी शाहरुखला मुंब्रा येथून ताब्यात घेत चौकशी केली. तपासात त्याने साथीदाराच्या मदतीने मानपाडा, नारपोली, चितळसर मानपाडा व डायघर तसेच इतर पोलिस ठाण्यांच्या हद्दीतून दुचाकी चोरी केल्याची कबुली दिली. चोरी करून तो या दुचाकी मुंब्रा येथील सिया कब्रस्थानाजवळ ठेवत होता. गॅरेजमध्ये काम करीत असल्याने जशे गिऱ्हाईक येतील, तशी त्यांची विक्री करत असल्याचे त्यांनी सांगितले.