विनातिकीट प्रवाशांकडून आठ कोटींचा दंड वसूल सकाळ वृत्तसेवा मुंबई, ता. १३ : मागील नऊ महिन्यांत पश्चिम रेल्वेने विनातिकीट किंवा अनियमित तिकीट घेऊन प्रवास करणाऱ्या ११ लाख ७६ हजार जणांवर कारवाई करून आठ कोटींचा दंड वसूल केला आहे. याच कालावधीत आरक्षित तिकिटांच्या हस्तांतरणांची ८ प्रकरणे आढळून आली आहेत. याद्वारे १२ हजार ८५ रुपयांची दंड वसुली करण्यात आली आहे. याशिवाय ४१३ गर्दुल्ले आणि ५३४ अनधिकृत फेरीवाल्यांना पकडण्यात आले. त्यापैकी १७५ जणांकडून ६० हजार ५१५ रुपयांचा दंड वसूल करण्यात आला आहे. तसेच ३५९ जणांवर कारवाई करून १ लाख ३३ हजार ६७० रुपयांची दंड वसूल करण्यात आला आहे. भारतीय रेल्वेने मागील वर्षीपासून विनामास्क प्रवाशांवर कारवाई करणे सुरू केले आहे. पश्चिम रेल्वेवर एप्रिल ते डिसेंबर २०२१ या कालावधीत १० हजारांहून अधिक विनामास्क प्रवास करणाऱ्या प्रवाशांकडून १९ लाख ७५ हजार रुपयांचा दंड वसूल केला आहे.