जिजाऊ आणि बाल शिवाजी महाराजांच्या पुतळ्यावर मेघडंबरी सकाळ वृत्तसेवा मुंबई, ता. १३ : भायखळा येथील वीरमाता जिजाबाई भोसले उद्यान व प्राणिसंग्रहालयातील जिजाऊ आणि बाल शिवाजी महाराज यांच्या पुतळ्यावर मेघडंबरी बसविण्यात येणार आहे. हा पुतळा ब्रांझचा असल्याने मेघडंबरीही ब्रांझची बसवण्यात येणार आहे. राणीच्या बागेत १९९८ मध्ये हा पुतळा बसविण्यात आला होता. बागेच्या मध्यभागी हा सव्वा मीटर उंचीचा पुतळा असून त्याचे अनावरण शिवसेनाप्रमुख बाळासाहेब ठाकरे यांच्या हस्ते झाले होते. पुतळा शिल्पकार विठ्ठल सानबाग यांनी बनवला आहे. या पुतळ्यावर मेघडंबरी बसविण्याची मागणी केली जात होती. त्यानुसार वारसा जतन (हेरिटेज) सल्लागार राहुल चेंबूर यांनी या मेघडंबरीचा आराखडा तयार केला आहे. साधारण दोन मीटर उंचीची ब्रांझपासून बनवलेली ही मेघडंबरी असेल. त्यासह इतर कामांसाठी ३८ लाख रुपयांपर्यंतचा खर्च येणार आहे. त्यासाठी पालिकेने निविदा मागवल्या आहेत. मेघडंबरी नागफणाच्या स्वरूपात आणि हेरिटेज लूक असलेली असेल.